Salyq raqymshylyǵy: Kásipkerler 15 mlrd teńgeden asatyn qaryzdaryn ótedi

NUR-SULTAN. QazAqparat - QR QM Memlekettik kirister komıteti osy jyldyń sońyna deıin shaǵyn jáne orta kásipkerlik sýbektilerine salyqtyq raqymshylyq júrgiziletindigin eskertti, dep habarlaıdy QazAqparat tilshisi.

Komıtet málimetinshe, búgingi kúni 43 755 salyq tóleýshi salyq raqymshylyǵyn qoldanyp, 15,3 mlrd teńge somasyndaǵy bereshegin ótedi. Olarǵa 5,2 mlrd teńge ósimpul jáne 0,3 mlrd teńge aıyppul somasy esepten shyǵaryldy.

Sondaı-aq, osy jyldyń tamyz aıynan jeke tulǵalarǵa arnalǵan salyqtyq raqymshylyq júrgizilip jatyr. Salyqtyq raqymshylyq aıasynda el azamattary ótken jyldar úshin salyqtyq mindettemelerine oraı negizgi qaryz somasyn tólegen jaǵdaıda olarǵa ósimpuldar shegeriledi. Qazirgi ýaqytta 12,6 mlrd teńge bereshegin tólegen 549 myńnan astam azamattyń 2,3 mlrd teńge ósimpuly esepten shyǵaryldy.

«Osy jyldyń sońyna deıin sanaýly kúnder qaldy. Osyǵan baılanysty negizgi qaryzdy óteýge jáne salyqtyq raqymshylyqty paıdalanýǵa asyǵyńyz», - dep eskertedi komıtetten.