Salyq organdary qyzmetteriniń birqatar kórsetkishteri jaqsardy - «Sandj» zertteý ortalyǵy
ASTANA. Qańtardyń 16-sy. QazAqparat /Marlan Jıembaı/ - Búgin QR Qarjy mınıstrliginiń Salyq komıtetinde «Salyq organdarynyń qyzmetiniń sapasyna monıtorıng jasaý» atty dóńgelek ústel ótti.
Shara barysynda Qazaqstannyń salyq tóleýshileri qaýymdastyǵynyń tapsyrysy boıynsha «Sandj» zertteý ortalyǵynyń júrgizgen zertteýleriniń qorytyndysy tanystyryldy.
Atalǵan zertteý ortalyǵynyń prezıdenti Janar Jandosovanyń aıtýynsha, saýalnamaǵa Qazaqstannyń 14 aımaǵynan, Astana men Almaty qalalarynan 1633 shaǵyn, orta jáne iri bıznes sýbektileri, 849 jeke tulǵa, sonymen qatar qalalyq jáne aýyldyq jerlerdiń tutynýshylaryna tikeleı qyzmet kórsetetin 455 salyq organdarynyń mamandary qatysqan.
«2008 jylǵa qaraǵanda kásipkerler arasynda da, halyq arasynda da salyq organdary qyzmetterine qanaǵattanýshylyq birshama ósken. Salyq organdary jumystarynyń jaqsy nátıjesi qyzmetterdi beıresmı alý úlesiniń 2008 jylǵy 5 paıyzdan, 2009 jyly 1 paıyzǵa tómendeýi boldy. Al jemqorlyqtyń týyndýyna qatysty birshama táýekel zańdy tulǵany joıý, jeke kásipkerlikti toqtaý qyzmetterin alǵan kezde oryn alady», deıdi J.Jandosova.
Onyń atap ótkenindeı, salyq organdary qyzmetteriniń birqatar kórsetkishteri jaqsarǵan. Máselen, qyzmetti ýaqytyly kórsetýi 80, memlekettik qyzmetkerlerdiń biliktiligi - 82, ádeptiligi - 84, olar kómek berýge daıyndyǵy - 75 jáne qyzmetter boıynsha aqparat berýi 75 paıyzǵa artqan. Sondaı-aq shaǵymdanýshylardyń úlesi 25-ten 11 paıyzǵa tómendegen.
