Salyq komıteti munaı jáne gaz sektoryndaǵy jobalar boıynsha Ónimderdi bólisý týraly kelisimderdi tekserýdi aıaqtady
ASTANA. Mamyrdyń 18-i. QazAqparat /Ernur Aqanbaı/ - QR Qarjy mınıstrliginiń Salyq komıteti munaı jáne gaz sektoryndaǵy jobalar boıynsha ónimderdi bólisý týraly kelisimderdi tekserýdi aıaqtady. Barlyq materıaldar Munaı jáne gaz mınıstrligine berildi.
Bul týraly búgin Astanadaǵy onlaın konferentsııanyń barysynda jýrnalısterge Salyq komıtetiniń tóraǵasy Dáýlet Erǵojın aıtty, dep habarlaıdy QazAqparat.
Aıta keteıik, aǵymdaǵy jylǵy qańtardyń 22-de Aqordada Úkimettiń ekonomıkalyq blogymen ótkizgen keńeste Elbasy N. Nazarbaev Qazaqstanda jumys istep jatqan jer qoınaýyn paıdalanýshy sheteldik kompanııalar salyqty qoldanystaǵy salyq zańnamasyna sáıkes tóleýi tıistigin aıtyp, Úkimetke óndirýshi kompanııalarǵa qoldanystaǵy salyq zańnamasy boıynsha salyq salý máselesin pysyqtaýdy tapsyrǵan bolatyn.
Al, aǵymdaǵy jylǵy aqpannyń 12-de D. Erǵojın sáýirdiń 1-ne deıin Ónimdi bólisý týraly buryndary jasalǵan kelisimsharttardy qazirgi salyq rejimine kóshirý týraly usynys daıyndalatynyn aıtqan bolatyn.
Onyń sózine qaraǵanda, sol kezde buryndary jasalǵan Ónimdi bólisý týraly kelisimsharttarǵa saraptama júrgizilgen. «Kelisimsharttardyń rásimdelýine jáne bekitilgen jekelegen kelisimsharttardyń zańdylyǵyna qatysty belgili bir máseleler bar. Salyq komıteti qazir bular boıynsha jumys jasap jatyr. Qazaqstanda kelisimsharttardy buzýǵa zańnamalyq negiz bar», dedi D. Erǵojın.
Onyń aıtýynsha, alaıda budan Qazaqstan tarapy kelisimsharttardy birden buzady degen oı týmaýy tıis. Naqty sheshimderdi daıyndaý úshin túrli tetikter men tásilder bar. Kelisimsharttardy buzý sheshim qabyldaýdaǵy sońǵy satylardyń biri bolyp tabylady.
«Eger matematıkalyq turǵydan esepteıtin bolsa, Ónimdi bólisý týraly kelisimder aıasynda jumys istep jatqan jer qoınaýyn paıdalaný jónindegi jekelegen kelisimsharttarǵa aǵymdaǵy salyq rejiminde jumys istegen paıdaly», dedi ol.
