Salyq kelisimsharttaryn zańsyz qoldanǵan salyq tóleýshiler bıýdjetke 361 mln. teńge tóledi
ALMATY. QazAqparat - Jyl basynan beri Almaty qalasynda sheteldik kompanııalardyń tabystaryn salyq salýdan zańsyz bosatqan 125 salyq tóleýshi (salyq agenti) anyqtaldy.
Osylaısha, bıýdjetke qosymsha 361 mln. teńge tólendi, dep habarlady Almaty qalasy boıynsha salyq departamentiniń baspasóz qyzmetinen.
Salyq zańnamalaryna sáıkes, sheteldik kompanııalardyń Qazaqstan Respýblıkasynda alǵan tabystaryna, olardyń túrlerine qaraı 5 paıyzdan 20 paıyzdyq mólsherleme boıynsha tabys salyǵy salynatyndyǵy belgili.
Alaıda, eger sheteldik kompanııalardyń qosarly salyq salýdan saqtaný týraly Halyqaralyq kelisimi bar bolsa, olardyń tabysy salyq salýdan bosatylady.
Óıtkeni, Qazaqstan Respýblıkasy álemniń 46 elimen «Qosarly salyq salýdan saqtaný jáne tabys pen kapıtalǵa salyq tóleýden jaltarýdy boldyrmaý týraly» Kelisim jasasqan.
Al sol salyqtyq kelisimsharttardyń erejelerin qoldaný úshin, sheteldik kompanııalar, tabys tóleıtin qazaqstandyq zańdy tulǵalarǵa, shet elderdiń salyq qyzmetteri bergen ári rezıdenttigin rastaıtyn qujattar usynady.
Biraq, tájirıbe kórsetkendeı, keıbir otandyq zańdy tulǵalar salyqtyq kelisimsharttardyń erejelerin, salyq zańnamalary men halyqaralyq kelisimderdiń talaptaryna saı kelmeıtin qujattardyń negizinde qoldanady.
Salyq zańnamasyna sáıkes, halyqaralyq kelisimsharttardyń erejeleri zańsyz qoldanylsa, sonyń saldarynan bıýdjetke salyq tolyq kóleminde tólenbese, salyq tóleýshi (salyq agenti) Qazaqstan Respýblıkasynyń zańdaryna sáıkes jaýapkershilikke tartylady.
