Salyq ınspektorynyń óltirilýi Qyrǵyzstannyń ońtústiginde ultaralyq dúrdarazdyqty týdyrdy
BІShKEK-OSh. 1 naýryz. QazAqparat /Arnur Rahymbekov/ - Búgin Osh oblysynyń Nooqat aýdan ortalyǵynda negizinen qyrǵyz azamattarynan quralǵan top mıtıngi uıymdastyryp, jergilikti salyq ınspektsııasynyń bastyǵy Saǵynbek Álimbaevty óltirgenderdi taýyp, jazalaýdy talap etti.
Qyrǵyz BAQ-tary habarlap otyrǵandaı, 23 aqpan kúni Nooqat aýdanynyń Mırmahmýdov aýyldyq okrýgynyń jer aýmaǵynda «Leksýs» avtokóligi tabyldy, onyń ishinen zorlyqpen óltirilgen 45 jastaǵy S.Álimbaevtyń máıiti tabyldy. BAQ ókilderiniń habarlaýynsha, belgisiz bireýler ony keýde tusynan atyp, jelkesine birneshe jerden jaraqat salǵan. Oqıǵa ornyn tekserý kezinde kólik ishinen Makarov tapanshasynyń 9 mm kalıbrli eki gılzasy men 2 oǵy tabyldy.
Osh oblysynyń ІІBB men Nooqat aýdandyq ІІB málimetinshe, 25 aqpan kúni qylmysty jasaǵandar anyqtaldy. Sonymen qatar, adam óltirýge tapsyrys berýshi de anyqtaldy, biraq mılıtsııanyń habarlaýynsha, ol kórshiles Ózbekstan aýmaǵynda boı tasalady.
Qaza tapqan salyq qyzmetkeriniń týǵan-týystary quqyq qorǵaý organdarynan qylmyskerlerdi dereý taýyp, jazalaýdy talap etti. Kýágerlerdiń aıtýynsha, mıtıngige qatysýshylar adam óltirýge tapsyrys berdi dep sanalyp otyrǵan azamattyń úıine baryp, ony órtep jiberdi. Sonymen qatar olar órtti sóndirýge de kedergi jasady. Qazirgi kúni bul jaǵdaıdyń Qyrǵyzstannyń ońtústiginde bolǵan «maýsym» oqıǵalaryna qatysty ultaralyq sıpat ala bastaǵany alańdatyp otyr. Ol kezde resmı emes málimet boıynsha eki myńnan astam azamat qaza tapqan edi.
Shıelenis aımaǵyna Osh oblysynyń quqyq qorǵaý organdarynyń barlyq jeke quramy tartyldy.
