Salyq esebiniń 98 paıyzy elektrondy túrde usynylýda

NUR-SULTAN. QazAqparat - Tsıfrlandyrý sharalary jemqorlyq faktileriniń tómendeýine jaǵymdy áserin tıgizip jatyr. Bul týraly Ortalyq kommýnıkatsııalar alańynda ótken baspasóz máslıhatynda komıtet basshysy Marat Sultanǵazıev aıtty, dep habarlaıdy QazAqparat tilshisi.

Memlekettik kirister komıtetinde sybaılas jemqorlyqqa qarsy profılaktıkalyq is-sharalar ótkizý, jańa ınnovatsııalyq sharalar men ádisterdi qoldanýǵa, sybaılas jemqorlyq táýekelderine ishki taldaý júrgizýge jáne olardy joıýǵa, sybaılas jemqorlyqqa qarsy mádenıetti qalyptastyrýǵa negizdelgen. Komıtet basshysynyń aıtýynsha negizgi kúsh ákimshilendirýdi tsıfrlandyrýǵa baǵyttalǵan. Ol sheshim qabyldaý protsesinen adamı faktordy alyp tastaý arqyly sybaılas jemqorlyqty barynsha azaıtady.

«Qazirgi ýaqytta salyq eseptiliginiń 98,9%-y elektrondyq túrde usynylady, ıaǵnı laýazymdy tulǵalarmen baılanys bolmaıdy. Búgingi tańda 44 qyzmettiń 37-si elektrondyq formatqa kóshirildi, tıisinshe salyq tóleýshiler olardy laýazymdy tulǵalarmen baılanyspaı-aq alý múmkindigine ıe. Qabyldanǵan sharalar sybaılas jemqorlyq deńgeıine aıtarlyqtaı áser etti jáne ótken jyldardyń sáıkes kezeńderimen salystyrǵanda MKO-da sybaılas jemqorlyq faktileriniń tómendegeni baıqalady», - deıdi ol.

Sonymen birge, laýazymdy tulǵalardy quryqtaýdyń árbir faktisi boıynsha, olardyń jasalýyna yqpal etken jaǵdaılar jáne odan basqa, ustalǵan qyzmetkerdiń tikeleı basshysynyń jáne óńirlik departamenttiń basshysynyń tártiptik jaýapkershiligin anyqtaý boıynsha tekserý sharalary, sot úkimin kútpeı-aq shuǵyl qaralmaq. Keıingi 2 jyldaǵy ustalǵan qyzmetkerlerdiń statıstıkasyna súıene otyryp, qyzmetkerlerdiń kóbirek bóligi keden beketteri men baqylaý-ótkizý beketterinde qyzmet etetin qyzmetkerlerge tıesili.