Salyq bereshegi bar jeke tulǵa neni bilýi kerek - Memlekettik kirister komıteti

NUR-SULTAN. QazAqparat – Salyq bereshegi bar azamattar 20 myń teńge aıyppul tóleıdi degen aqparat jalǵan. Memlekettik kirister komıteti osyndaı qaýesetti joqqa shyǵardy, dep habarlaıdy QazAqparat komıtettiń baspasóz qyzmetine silteme jasap.

«Sońǵy ýaqytta áleýmettik jeliler men messendjerler arqyly ótken salyqtyq kezeńder úshin bereshegi bar azamattar boryshyn bıylǵy 1 qazanǵa deıin ótemegen jaǵdaıda 8 AEK (20 000 teńge shamasynda) kólemindegi aıyppul esepteletini týraly habarlama taratylýda. QR QM Memlekettik kirister komıteti bul aqparattyń shyndyqqa janaspaıtynyn resmı túrde habarlaıdy», delingen habarlamada.

Komıtettiń málimetinshe, jeke tulǵalar bıýdjetke jer jáne múlik salyqtaryn ótken jyl úshin bıylǵy jyldyń 1 qazanyna deıin tóleýi tıis. Kólik salyǵy aǵymdaǵy jyl úshin 31 jeltoqsanǵa deıin óteledi.

«Qoldanystaǵy QR Salyq zańnamasynda aıyppul esepteý sharalary kórsetilmegen. Tek salyqty ýaqytyly tólemegen jaǵdaıda ótkizilgen ár kúnge ósimpul esepteledi. Sondaı-aq, jyldyń aıaǵyna deıin jeke tulǵalarǵa arnalǵan salyqtyq raqymshylyq úrdisi júrýde. Onyń erejelerine sáıkes, jeke tulǵa beresheginiń negizgi somasyn ótegen jaǵdaıda ósimpul avtomatty túrde esepten shyǵarylady», delingen habarlamada.

Salyq tóleýshiler boryshynyń bar-joǵyn Memlekettik kirister komıtetiniń saıtynda nemese myna silteme boıynsha teksere alady.