«Salyq ámııanyn» 7 myńnan astam qazaqstandyq paıdalanǵan
«Kazirgi kezde ınnovatsııany 7 090 adam paıdalandy. Olar ózderiniń jeke shottaryn 22,9 mıllıon teńgege toltyrdy», - delingen QR Qarjy mınıstrligi Memlekettik kirister komıteti baspasóz qyzmetiniń málimetinde.
«Salyq ámııanyna» aqsha jiberý arqyly salyq tóleýshi birqatar jeńildikterge ıe boldy:
• «Salyq ámııanynan» salyq bereshegin avtomatty túrde esepten shyǵarý;
• qaryz somalaryn bir salyqtan ekinshi salyqqa avtomatty túrde aýdarý;
• tólem týraly habarlama alý;
• negizsiz salyq sanktsııalaryn alyp tastaý;
• qate tólemderdi joıý;
• salyq salý obektilerin qaraý.
Sondaı-aq, «E – Salyq» mobıldik qosymshasynda azamattarǵa yńǵaıly bolý úshin jol polıtsııasy organdarynda tirkeý esebinde turǵan kólik quraldary boıynsha derekterdi qaraýǵa, salyqtyń qandaı kólik quraldarymen eseptelgenin kórýge múmkindik bar.
Bul qyzmet kólik quralynyń sıpattamalaryn ózgertýge, ony óz atynan shyǵarýǵa (satýǵa) baılanysty kólik quralyn málimetter bazasynan alyp tastaý úshin onlaın rejıminde júginýge múmkindik beredi.
«Іske qosylǵannan bastap, bıylǵy 19 qazanǵa deıin 7 493 adam túzetý múmkindigin paıdalanyp úlgerdi, onyń – 7 312-si kólikke, 117-si múlikke qatysty.
Interfeıste tıisti satý qujattaryn nemese kólik quralynyń derekterin túzetý jetkilikti. Birneshe kún ishinde aqparat túzetiledi.
Sonymen qatar, 30 maýsymnan bastap – 507 salyq tóleýshi artyq tólemderdi basqarý qyzmetin qoldanyp úlgerdi.
Jalpy, portalǵa kirip, mobıldik qosymshany 96 263 adam júktep úlgerdi.
Tólenýge jatatyn kólik salyǵynyń somasyn Memlekettik kirister komıtetiniń www.kgd.gov.kz portaly, egov.kz elektrondy úkimet portaly, sondaı-aq turǵylyqty jeri boıynsha aýdandyq Memlekettik kirister basqarmalary arqyly bilýge bolady», - delingen aqparatta.
