Salvador prezıdentine sheksiz qaıta saılaný quqyǵy berildi
ASTANA. KAZINFORM — Salvador prezıdenti Naıb Býkeleniń bıleýshi partııasy el konstıtýtsııasyna ózgertýler engizýdi usyndy, ol Býkelege sheksiz qaıta saılanýǵa jáne onyń prezıdenttik merzimin alty jylǵa deıin uzartýǵa múmkindik berdi, dep habarlaıdy CNN.

Bul konstıtýtsııalyq túzetýlerdi 31 shildede Zań shyǵarý palatasy qabyldaǵany habarlanyp, «Jańa ıdeıalar» partııasynyń depýtaty Ana Fıgeroa konstıtýtsııanyń 5-babyna túzetýler engizýdi usyndy. Onyń ishinde saılaýdyń ekinshi kezeńin joıý — ıaǵnı kóp daýys jınaǵan eki kandıdat arasyndaǵy ekinshi kezeńdi alyp tastaý. Kópshilik daýysty ıelengen Býkele partııasy ózgeristerdi tez maquldady — 57 depýtat qoldap, 3 depýtat qarsy boldy.
2021 jyly Býkeleniń partııasy taǵaıyndaǵan Joǵarǵy Sot sýdıalary konstıtýtsııalyq tyıymǵa qaramastan onyń ekinshi merzimge qaıta saılanýyn zańdy dep sheshti. Ol 2024 jyly óte kóp daýyspen qaıta saılandy. Endi bul ózgerister Býkeleniń sheksiz merzimge prezıdent bolyp qaıta saılanýyna jol ashady.
Oppozıtsııalyq depýtat Marsela Vıllatoro bul sheshimdi synap, Salvadorda «demokratııa óldi» dep málimdedi. Ol sondaı-aq shekteýsiz prezıdenttik saılaý bılikti teris paıdalanýǵa, sybaılas jemqorlyqqa jáne saıası qatysýdyń tómendeýine ákeletinin aıtty.
Prezıdent saılaýshylarǵa ózin «álemdegi eń zamanaýı dıktator» dep atap, qylmysqa qarsy qatań saıasat júrgizýge ýáde berip otyr. Ol burynǵy jetekshiler sııaqty qylmystyq toptarmen aýyzbirshilik jasady degen kúdikke ilingenimen, eldegi oń ózgeristerge baılanysty buǵan kóp azamattar kóz jumyp otyr.
Eske sala keteıik, Salvador prezıdenti Venesýelaǵa tutqyndar almasýdy usynǵany jaıly jazǵan edik.