Salvador Dalıdiń 61 túpnusqa eńbegi Astanaǵa jetkizildi
ASTANA. KAZINFORM – Elordanyń «Has Sanat» óner galereıasynda Lumiere-Hall mýzeıi uıymdastyrǵan «Salvador Dalı. Qupııa jazý» kórmesi ashyldy. Ekspozıtsııada sıýrrealısttiń 61 túpnusqa lıtografııasy usynylǵan.
Lumiere-Hall mýzeıiniń negizin qalaýshy Polına Egarmınniń aıtýynsha, bıyl sıýrrealızmge, álemdik beıneleý ónerindegi avangardtyq baǵytqa 100 jyl tolady.
Oǵan qosa, bıyl álem sıýrrealızmniń eń kórnekti sheberleriniń biri Salvador Dalıdiń týǵanyna 120 jyl tolady.
«Qazir búkil álemde kórmeler men jármeńkeler ótip jatyr, jýrnaldarda tutas nómirler osy taqyrypqa arnalyp, kitaptar men albomdar shyǵarylýda. Búginde Eýropanyń, AQSh-tyń, Azııanyń kez kelgen úlken qalasy sıýrrealızmmen ómir súredi. Biz Qazaqstannyń da osy álemdik sıýrrealızmdi toılaý kartasyna engenin qaladyq», - deıdi Polına Egarmın.
Kórmede jeke kollektsıoner jınaǵan 61 túpnusqa grafıkalyq týyndylar jınaǵy bar.
«Bul toptamany elimizge ákelý úshin kóp kúsh jumsadyq. Týyndylar túrli mýzeıge kórmege beriledi jáne biz óz kezegimizdi bir jyl kúttik. Jeke kollektsıoner bul jumystary 10 jyl boıy jınaqtaǵan. Mýzeılerden, jeke kollektsıonerlerden, tipti dıvannyń artynan kezdeısoq tabylǵan jumystar bar», - deıdi spıker.
Ekspozıtsııa quramyna «Karmen», «Alısanyń ǵajaıyptar elinde», «Dalınıan jylqylary», «Mahabbat trılogııasy» serııalarynyń lıtografııalary, sondaı-aq Pedro de Alarkonnyń «Treýgolka» povesine arnalǵan 20 ıllıýstratsııasy engen.
Mýzeı basshysynyń aıtýynsha, Salvador Dalı óziniń kartınalarymen ǵana emes, kóptegen ónertanýshylar atap ótken ekstsentrıstik ersi qylyqtarymen de tanymal boldy.
«Ol sýretshi me, álde shoýmen be – bul týraly barlyq ónertanýshylar, mádenı qaıratkerler pikir talastyryp keledi. Dalı men Pıkasso ómirde óte tanymal jáne tabysty boldy. Barlyǵy olardyń jumysyn qalaǵandyqtan týyndylar qoljetimdi bolýy úshin baspa grafıkasyna kóshti. Bul ónerdi elıtalyq emes, qoljetimdi etýge tyrysqan alǵashqy sýretshi jáne bul da óte mańyzdy», - dep qorytyndylady P. Egarmın.
S. Dalı týyndylarynyń kórmesi 29 qyrkúıekke deıin jalǵasady.
