Saltanattyń óliminde óz kinám bar ekenin moıyndaımyn, uryp-soqqanym ras — Bıshimbaev
ASTANA. KAZINFORM — Astana qalasynyń qylmystyq ister jónindegi mamandandyrylǵan aýdanaralyq sotynda eks-mınıstr Qýandyq Bıshimbaev sot pen aıyptaýshylar suraǵyna jaýap berdi.
— Búkil taraptar jaýap alǵannan keıin qınaý epızody boıynsha ustanymyńyz ózgerdi me? — dep suraq qoıdy sýdıa Aıjan Qulbaeva Qýandyq Bıshimbaevqa.
— Joq, kináni moıyndamaımyn, men Saltanatty eshqashan qınaǵan emespin, — dep jaýap berdi sottalýshy.
Sonymen birge, Q. Bıshimbaev asa qatygezdikpen adam óltirý epızodyna da pikirin bildirdi.
— Men asqan qatigezdikpen qasaqana adam óltirý kinásin moıyndamaımyn, biraq onyń óliminde óz kinám bar ekenin moıyndaımyn. Meniń áreketterim onyń ólimine sebep boldy, ol úshin qatty ókinemin. Biraq ony qasaqana óltirgisi keldi, azaptady degen aıyptarmen kelise almaımyn. Iá, urdym, ıá, soqqy jasadym — biraq ony óltirý maqsatymen emes, mundaı saldar bolady dep múlde oılamadym, — dedi ol.
Sottalýshy Saltanattyń Núkenovanyń betinen urǵanyn, bas súıek-mı zaqymy bolady dep oılamaǵanyn aıtty.
Aıta keteıik, sot otyrysynda Saltanat Núkenovanyń nemere ápkelerinen, qurbysynan jáne basqa da kýágerlerden jaýap alý josparlanǵan.
Sodan keıin asa aýyr qylmysty jasyrý jáne asa aýyr qylmys jóninde habarlamaý faktisi boıynsha aıyp taǵylǵan B. Baıjanov jaýap beredi.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty.
Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi.
11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti.
Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-keris qalaı bastalǵany týraly málimetter aıtty jáne marqumnyń bet-álpeti kógergen sýretti kórsetti.
1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.
Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.
