Saltanat Tursynbekova Almatyda zııatkerlik menshikti qorǵaýǵa arnalǵan jıyn ótkizdi
ALMATY. QazAqparat - Almatyda QR Prezıdenttigine kandıdat Saltanat Tursynbekova zııatkerlik menshikti qorǵaý máseleleri boıynsha keńes ótkizdi, dep habarlaıdy QazAqparat tilshisi.
Prezıdenttikke kandıdatpen kezdesýdegi negizgi áńgime bilim ekonomıkasy: tehnologııalar, noý-haý, zııatkerlik menshik týraly boldy.
Saltanat Tursynbekova Almatyny ekinshi kún qatarynan aralap júr. Birinshi kúni ol qala turǵyndarymen kezdesip, tutynýshylardyń quqyqtaryn qorǵaý máselelerin talqylaǵan.
Almaty - qazirdiń ózinde kandıdattyń saılaý aldyndaǵy úgit-nasıhat jumystarymen saparlaǵan altynshy óńiri. Quqyq qorǵaýshy buǵan deıin elordada, Qaraǵandy, Aqmola, Túrkistan oblystary men Shymkent qalasynda bolǵan.
Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady.
19 qarasha – respýblıka boıynsha tynyshtyq kúni. Al, 20 qarashada Prezıdent saılaýy ótedi.
