Saltanat Tompıeva Kanadanyń avıatsııalyq bılik ókilderimen kezdesý ótkizdi
ASTANA.KAZINFORM - QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva Kanada Kólik mınıstrliginiń ushý qaýipsizdigi jáne avıatsııalyq qaýipsizdik baǵyty basshysynyń orynbasary Nıkolas Robınsonmen myrzamen kezdesti.
Kezdesý Marrakesh qalasynda (Marokko) ICAO Global Implementation Support Symposium 2026 aıasynda ótti. Kezdesýge Kanadanyń IKAO janyndaǵy Turaqty ókili Karın Asselın hanym jáne Kanada Kólik mınıstrliginiń Halyqaralyq avıatsııa jónindegi atqarýshy dırektory Djon Velıý myrza, Qazaqstan Respýblıkasynyń IKAO janyndaǵy Turaqty ókili Tımýr Tlegenov myrza qatysty.
Taraptar azamattyq avıatsııa salasyndaǵy yntymaqtastyq máselelerin, onyń ishinde ushý qaýipsizdigi, avıatsııalyq qaýipsizdik jáne ozyq tájirıbe almasý máselelerin talqylady. Sondaı-aq áýe qatynasy týraly kelisimniń mártebesi men elder arasynda tikeleı turaqty reıs ashý perspektıvalary qaraldy.
– Qazaqstandaǵy avıatsııa salasy elimizdiń álemdegi eń iri jáne teńizge shyǵa almaıtyn geografııalyq erekshelikterin eskere otyryp, strategııalyq mańyzǵa ıe. Osyndaı jaǵdaıda azamattyq avıatsııa kóliktik baılanysty qamtamasyz etýde jáne ekonomıkalyq damýda sheshýshi ról atqarady, – dep atap ótti Saltanat Tompıeva.
Kezdesý barysynda 2025 jyly Qazaqstan Respýblıkasyndaǵy jolaýshylar aǵynynyń pandemııaǵa deıingi kórsetkishtermen salystyrǵanda 80%-ǵa óskeni, sondaı-aq ushý qaýipsizdigi (82%) jáne avıatsııalyq qaýipsizdik (95,7%) boıynsha Halyqaralyq azamattyq avıatsııa uıymynyń standarttaryna sáıkestiktiń joǵary deńgeıi atalyp ótti.
Taraptar seriktestikti odan ári damytýǵa jáne avıatsııanyń qaýipsizdigi men turaqty damýy salasyndaǵy yntymaqtastyqty nyǵaıtýǵa múddeli ekenin rastady.
Aıta keteıik, Qazaqstan avıatsııalyq qaýipsizdik boıynsha álemdegi TOP-20 eldiń qataryna endi.
Ortalyq Azııa elderi ushý qaýipsizdigi men avıatsııalyq normatıvterdi jetildirý boıynsha sheshim qabyldady.
