Saltanat Tompıeva IKAO elshisi bolyp taǵaıyndaldy
ASTANA. KAZINFORM – Qazaqstan Kólik mınıstrliginiń Azamattyq avıatsııa komıtetiniń tóraǵasy Saltanat Tompıeva Halyqaralyq azamattyq avıatsııa uıymynyń (IKAO) Bas hatshysy Hýan Karlos Salazardyń sheshimimen IKAO-nyń Ǵalamdyq elshiler baǵdarlamasy aıasynda elshi bolyp taǵaıyndaldy.
Bul taǵaıyndaý IKAO tarapynan Qazaqstan Respýblıkasyna kórsetilgen joǵary senimdi bildiredi ári eldiń halyqaralyq azamattyq avıatsııa kún tártibin ilgeriletýge qosqan úlesiniń moıyndalýy bolyp sanalady.
Qazaqstan ókili IKAO-nyń 56 memleketti biriktiretin Eýropalyq jáne Soltústik Atlantıkalyq óńirlik bıýrosy (EUR/NAT) sheńberinde irikteldi. Qazaqstannyń tańdalýy eldiń IKAO-nyń 2026–2050 jyldarǵa arnalǵan Strategııalyq josparynda aıqyndalǵan basymdyqtardy iske asyrýdaǵy belsendi ári tıimdi rólin kórsetedi.
IKAO elshisi retindegi qyzmetinde Saltanat Tompıeva azamattyq avıatsııany damytýdyń negizgi baǵyttary boıynsha, atap aıtqanda avıatsııa salasynyń ornyqty ósýin qamtamasyz etý, bilikti avıatsııa mamandaryn daıarlaý jáne tartý, sondaı-aq saladaǵy áıelder men jastardyń qatysýyn keńeıtý máseleleri boıynsha habardarlyqty arttyrýǵa úles qosatyn bolady.
Azamattyq avıatsııa komıteti málimetinshe, atalǵan qyzmet erikti negizde jáne Birikken Ulttar Uıymy men IKAO-nyń táýelsizdik, beıtaraptyq jáne etıka qaǵıdattaryn qatań saqtaı otyryp júzege asyrylady.
Qazaqstan Respýblıkasynyń Kólik mınıstrligi bul taǵaıyndaý Qazaqstannyń jahandyq azamattyq avıatsııa júıesindegi belsendi rólin, sondaı-aq ornyqty damý, ınklıýzıvtilik jáne adamı kapıtaldy damytý salasyndaǵy halyqaralyq bastamalarǵa berik ustanymyn rastaıtynyn atap ótedi.
Aıta keteıik, Qazaqstannyń avıatsııalyq qaýipsizdik boıynsha IKAO standartyna sáıkestigi 95,7%-ǵa jetti.