Saltanat Tompıeva IKAO Assambleıasy komıssııasy tóraǵasynyń orynbasary bolyp saılandy
ASTANA. KAZINFORM – Saltanat Tompıeva IKAO Assambleıasynyń 42-sessııasynyń Ákimshilik komıssııasy tóraǵasynyń orynbasary bolyp saılandy. Bul týraly Azamattyq avıatsııa komıtetiniń baspasóz qyzmeti habarlady.
Kanadanyń Monreal qalasynda memleketter delegatsııalary basshylarynyń sheshimimen Ákimshilik komıssııasynyń tóraǵasy bolyp IKAO-daǵy Kolýmbııanyń Turaqty ókili Maýrısıo Ramıres Koppel taǵaıyndaldy.
Tóraǵa orynbasarlary qyzmetine Azamattyq avıatsııanyń bas dırektory Serra-Leone Mýsaıero Barrı, IKAO Keńesindegi Úndistan ókili Angshýmalı Rastogı jáne QR KM Azamattyq avıatsııa komıtetiniń tóraǵasy Saltanat Tompıeva saılandy. Bul laýazymdy alǵash ret Ortalyq Azııa ókili ıelenip otyr.
Ákimshilik komıssııasynyń otyrystarynyń ashylýyna ICAO Keńesiniń Prezıdenti Salvatore Shakkıtano jáne IKAO bas hatshysy Hýan Karlos Salasar qatysty.
Ákimshilik komıssııa 3 jyldyq bıýdjetti, qarjylyq máselelerdi, syrtqy aýdıtordy taǵaıyndaýdy, sondaı-aq adamı resýrstardy basqarý, genderlik teńdik jáne basqa da máselelerdi qarastyrdy.
IKAO Keńesiniń Prezıdenti Salvatore Shakkıtano usynylǵan bıýdjet jobasy uıymnyń uzaq merzimdi turaqtylyǵyn nyǵaıtyp, halyqaralyq avıatsııanyń qaýipsiz ári turaqty damýyna baǵyttalǵan basym bastamalardy iske asyrýǵa múmkindik beretinin atap ótti.
Qazaqstan avıatsııa salasyndaǵy genderlik teńdikke qatysty eki qujat usyndy. Saltanat Tompıeva IKAO Assambleıasynyń resmı nomınatsııasyn – «Avıatsııany qalyptastyratyn áıelder» atty bastamany jarııa etti. Bul nomınatsııa ár Assambleıa sessııasynda úsh mamanǵa tabystalyp, moıyndaý sertıfıkatymen qosa berilmek. Nomınanttar aeronavıgatsııa, qaýipsizdikti baqylaý, avıatsııalyq medıtsına, ınjenerııa, paıdalaný jáne basqa da salalardy tanystyrady. Bul nomınatsııa Uıymnan qarjylyq shyǵyndy talap etpeıdi, alaıda mamandardy yntalandyrýǵa jáne jańa býyndy avıatsııada mansap qurýǵa yntalandyrýǵa baǵyttalǵan.
Qazaqstan bastamasy Qytaı, Kanada, Ońtústik Afrıka, Perý, Koreıa Respýblıkasy, Japonııa, sondaı-aq ACI jáne IFALPA halyqaralyq uıymdary jáne basqalary tarapynan aldyn ala qoldaý tapty.
Maýrısıo Ramıres Koppel Komıssııanyń nomınatsııany engizý jónindegi usynysty quptaıtynyn aıtty. Frantsııa ókili nomınanttardy anyqtaý ádistemesin IKAO Keńesinde qarastyrýdy usyndy. Qorytyndy qarardy komıssııa 29 qyrkúıekte qabyldaıdy.
Aıta ketelik Erjan Ashyqbaev qyzmetinen bosatylǵany týraly jazǵan edik.