Saltanat Rahymbekova alleıasyna júzden astam aǵash otyrǵyzyldy
NUR-SULTAN. QazAqparat – Elordanyń astanalyq saıabaǵyndaǵy Saltanat Raqymbekova alleıasyna 110 túp aǵash otyrǵyzyldy, dep habarlaıdy QazAqparat tilshisi.
Saltanat Rahymbekova «Jasyl» ekonomıka qoldaý jáne G-Global-dy damytý koalıtsııasynyń jáne aýyl áıelderi men aýyl jastaryn qoldaý jónindegi birqatar qoǵamdyq uıymdardyń negizin qalaǵan edi. Ol 2020 jyly tamyz aıynda pnevmonııadan kóz jumdy.
Qazan aıynda onyń seriktesteri men pikirlesteri, shákirtteri azamattyq qoǵamdy, «jasyl» ekonomıkany damytý men qorshaǵan ortany qorǵaý salasyndaǵy eńbekterin urpaqtan-urpaqqa jetkizý maqsatynda Saltanat Rahymbekova atyndaǵy alleıa ashty.
«Alleıa ashylǵanda 55 aǵash otyrǵyzdyq. Sebebi Saltanat 55 jasynda ómirden ótti. Endi jadymyzda máńgi 55-te bolyp qalady. Búgin 110 aǵash egemiz. Onyń jartysyn áriptesteri, qalǵan 55-in jaqyndary men týǵan-týystary otyrǵyzady. Endi jyl saıyn kóktem men kúzde mamandarmen aqyldasa otyryp, aǵash sanyn kóbeıtemiz degen oıymyz bar. Eń azy 55 taldan otyrǵyzýǵa tyrysamyz. Bul sharany qoldaǵany úshin qala ákimdigi men aýdandyq ákimdikterge, park ákimshiligine alǵys aıtamyz. Odan keıin árıne Saltanattyń jumystaǵy áriptesteri men joldastaryna da biraýyzdan atsalyp, kómekteskenderi úshin rahmet», - dedi S. Rahymbekovanyń kúıeýi, «Aýyl» partııasy tóraǵasynyń birinshi orynbasary Tóleýtaı Rahymbekov.
Sonymen birge, qoǵam qaıratkeri Aıgúl Soloveva alleıaǵa aǵash otyrǵyzýdyń turaqty dástúrge aınalatynyn jetkizdi.
«Biz búgin qoǵam úshin esh qaıtarymsyz jumys istegen osyndaı shýaqty, jarqyn adamdy úlken ókinishpen eske alamyz. Alleıa árqashan turǵyndarǵa jaıly atmosfera syılaıdy. Árıne, onyń izbasarlary, shákirtteri kútim jasap, jaqsartatyny sózsiz, bul – Saltanat Temirqulqyzy Qazaqstanda júrgizgen barlyq jobalardan keıin adamnyń «jasyl» iz qaldyrýynyń jaqsy mysaly», - dedi A. Soloveva.
Óz kezeginde Jasyl ekonomıkany qoldaý jáne G-Global-dy damytý Koalıtsııasynyń atqarýshy dırektory Ashat Súleımenov Prezıdenttiń 5 jylda el boıynsha 2 mlrd-tan astam aǵash egilýi kerek degen tapsyrmasyn atap ótti.
«Osy ekologııalyq aktsııa QR Prezıdenti Q.K. Toqaevtyń taıaý aradaǵy bes jyl ishinde búkil respýblıka boıynsha eki mıllıardtan astam aǵash otyrǵyzý arqyly Qazaqstandy aýqymdy kógaldandyrý týraly bastamasyn qoldaý maqsatynda ótkizilýde. Aǵash otyrǵyzýǵa memlekettik organdar tarapynan mınıstrlik ókilderi, depýtattar, halyqaralyq uıymdar atsalysady», - deıdi A. Súleımenov.
Aıta keteıik, Saltanat Rahymbekova QR Prezıdenti janyndaǵy «Jasyl ekonomıkaǵa» kóshý jónindegi keńes múshesi, Qazaqstannyń Azamattyq Alıansynyń prezıdenti, QR Ekologııa, geologııa jáne tabıǵı resýrstar mınıstrligi Qoǵamdyq keńesiniń tóraǵasy, «jasyl» ekonomıka kóshbasshysy boldy. Qoǵam qaıratkeri, ekonomıka ǵylymdarynyń doktory, professor, 200-den asa ǵylymı maqalalar men «Jasyl jol. Expo-2017 jáne jasyl ekonomıka» (2018 j.), «Turaqty damýdyń jasyl kody» (2020 j.) kitaptarynyń avtory.
Kózi tirisinde S. Rahymbekova azamattyq qoǵamnyń damýyna baǵa jetpes úles qosty, onyń ishinde jasyl ekonomıkany, ekologııany jáne aýyldaǵy áıelder kásipkerligin damytýda ondaǵan áleýmettik jobalardy sátti júzege asyryp, Qazaqstannyń 7 aımaǵynda jasyl tehnologııalar ortalyǵy sııaqty turaqty alańdar qurǵan, aýyl áıelderiniń forýmdary, BUU-nyń Turaqty damý maqsattary boıynsha kóshbasshylar qozǵalysy jáne t. b.jumystarda óz izin qaldyrdy.
S. Rahymbekova atyndaǵy alleıaǵa aǵash otyrǵyzý sharasyna mınıstrlik basshylary, QR Parlamentiniń depýtattary, qoǵam qaıratkerleri, áriptesteri, shákirtteri men dostary, Saltanat Temirqulqyzynyń otbasy men týystary qatysty.
