Saltanat Núkenovanyń ólimin tirkegen jedel járdem qyzmetkeri sotta ne aıtty

ASTANA. KAZINFORM — Astana qalasynyń qylmystyq ister jónindegi mamandandyrylǵan aýdanaralyq sotynda Saltanat Núkenovanyń ólimin anyqtaǵan jedel járdem dárigeri Nurlan Muhambedenov jaýap berip jatyr. 

Onyń aıtýynsha, 2023 jyly 9 qarasha keshki saǵat 19:55–te BAU meıramhanasynan qońyraý túsken.

Onda áıeldiń es-tússiz, dem almaı jatqany aıtylǵan. Jedel járdem 8 mınýtta oqıǵa ornyna jetken. 

«Meniń qasymda júrgizýshi jáne kómekshim boldy, úsheýmiz reanımatsııalyq brıgada retinde meıramhanaǵa kirdik. Bizdi aıyptalýshy Baıjanov syrtta kútip aldy jáne 2-qabattaǵy VIP bólmege alyp keldi. Jol boıy sóılesken joqpyz. Dıvanda jalańash denesi kórpemen jabylǵan áıel jatty. Máıit qusatyp betine deıin kórpemen jaýyp tastaǵan. Ony edenge túsirip, júrek-ókpe reanımatsııasyn bastadyq», — dedi N. Muhambedenov. 

Jedel járdem dárigeri patsıenttiń pýlsi soqpaǵanyn, tynysy men júrek qaǵysy da toqtaǵanyn atap ótti. Terisi salqyn tartqan jáne bozarǵan, kóziniń qarashyqtary úlkeıgen. 

«Kózge kórinetin dene zaqymy retinde bet, muryn gematomasyn, ıektegi soqqylardy, sondaı-aq jambasyndaǵy jaraqat pen baltyryndaǵy gematomany aıtýǵa bolady. Kóziniń aınalasy, qoly ıyqtan tómen kógergen. Baıjanov bizge marqumnyń pasporttyq derekterin berdi. Biz dene jaraqaty men ólim jaǵdaıy jóninde 102-ge habarladyq. Sodan keıin polıtsııa, aǵa leıtenant Marchenko keldi. Máıitti tapsyryp, saǵat 22:39–da shyqtyq», — dedi dáriger. 

Sonymen birge, kýáger Bıshimbaev pen Baıjanovtan oqıǵanyń sebebi men anamnezin suraǵanyn, biraq tıisti jaýap ala almaǵanyn jetkizdi. 

Ekeýiniń áńgimesi kedergi keltirgendikten dáriger olardyń syrtqa shyǵýyn suraǵan.