Saltanat Núkenovanyń ólimi: kassatsııalyq sot Baıjanovtyń jazasyn ózgerissiz qaldyrdy
ASTANA. KAZINFORM – Kassatsııalyq sot Saltanat Núkenovanyń ólimi isinde asa aýyr qylmysty jasyrǵany úshin sottalǵan Qýandyq Bıshimbaevtyń týysy Baqytjan Baıjanovtyń apellıatsııalyq shaǵymyn qanaǵattandyrǵan joq.
Sot protsesinde advokaty Álibek Sekerov Baıjanovtyń buryn sottalmaǵanyn, oń minez qulqyn, kámeletke tolmaǵan úsh balasy bar ekenin jáne otbasynyń jalǵyz asyraýshysy ekenin, sondaı-aq, marqum jábirlenýshige dene jaraqatyn salmaǵanyn alǵa tartty.
– Sot QR Qylmystyq Kodeksi 55-babynyń, 2-tarmaǵy, 2-tarmaqshasyna júgindi. Bul norma joǵary jazany taǵaıyndaýdy ǵana emes, naqty jaǵdaılarǵa baılanysty jazany tómendetýdi de qarastyrady. Demek, jazany aýyrlatatyn faktorlardyń joqtyǵy, kerisinshe, jeńildetetin sebepterdiń bolýy atalǵan norma boıynsha jazany tómendetýge negiz bola alady, - dedi Álibek Sekerov.
Sol sebepti, sottalýshynyń qorǵaýshy tarapy bas bostandyǵynan aıyrý jazasynyń merzimin qysqartýdy nemese QR QK-niń 63-baby «Shartty sottaý» jazasyna aýystyrýdy surady.
Al jábirlenýshi taraptyń advokaty Álııa Omarova Baıjanovtyń oqıǵa ornyna 10:20-da kelip, jedel járdem qyzmetine keshke ǵana habarlasqanyn, kúni boıy asa aýyr qylmysty jasyrýǵa tyrysqanyn eske saldy. Sonymen qatar, alǵashqy ınstantsııa soty sheshimdi dáleldengen aıyp negizinde shyǵarǵanyn málimdep, sottalýshynyń kassatsııalyq sotqa túsirgen shaǵymyn qanaǵattandyrmaýdy surady.
Prokýror Asqarova da sot úkimin ózgerissiz jáne sottalýshy advokattarynyń shaǵymyn qanaǵattandyrýsyz qaldyrýdy surady.
– Sot jaza taǵaıyndaǵanda, jasalǵan qylmystyń aýyrlyq deńgeıi men qoǵamǵa qaýpin, sottalýshyǵa qatysty jeke derekterdi, jazany jeńildetetin jaǵdaılardyń bar ekenin jáne aýyrlatatyn sebepterdiń joqtyǵyn tolyqtaı eskerdi. Osylaısha, jaza QR QK 52-babyna sáıkes jáne 55-baptyń 2-tarmaǵyndaǵy talaptardy eskere otyryp, taǵaıyndaldy. Ol ádil jáne jasalǵan qylmysqa saı, - dedi ol.
Sýdıa Seralın sottalýshynyń qorǵaýshylaryn jáne zaıyby Aınur Kúldeevany, marqum Saltanat Núkenovanyń aǵasy Aıtbek Amangeldi jáne onyń advokattaryn, sondaı-aq, memlekettik aıyptaýshyny tyńdaı kele, Baıjanovtyń jazsyn ózgerissiz qaldyrdy, kassatsııalyq sotqa túsken shaǵymdy qanaǵattandyrǵan joq.
– Baıjanov asa aýyr qylmysty aldyn ala josparlamaı jasyrý boıynsha kináli dep tanyldy. Sot sottalýshynyń Núkenova qaıtys bolǵannan keıin, asa aýyr qylmys jóninde bile tura, onyń izin jasyrý sharalaryn atqarǵanyn anyqtady. Naqtyraq aıtqanda, memlekettik organdar qyzmetkerlerine meıramhanaǵa kirýge kedergi keltirdi, VIP-bólmege kiretin joldy jaýyp tastady, meıramhanany japty, meıramhana qyzmetkerlerin taratyp jiberdi, beınebaqylaý kameralaryndaǵy vıdeojazbalardy joıdy, meıramhanadaǵy beınebaqylaý kameralaryn sóndirdi, Núkenovanyń telefonyn basqa jerge apardy, meıramhanaǵa birneshe ret áıel adamnyń kıimin alyp keldi. Osylaısha, asa aýyr aýyr qylmysty aldyn ala josparlanbaǵan kúıde jasyrýǵa tyrysty. Sotta aıyptaýlar dáleldengen, úkimniń negizi bar, - dedi sýdıa.
Bul rette, 2025 jyldyń tamyz aıynda Baıjanovqa Qazaqstan Konstıtýtsııasynyń 30 jyldyǵyna baılanysty raqymshylyq jasaldy.
Onyń jaza merzimi úshten bir bólikke, ıaǵnı bas bostandyǵynan aıyrýdyń 1 jyl 4 aı 17 kúnge qysqartylǵan.
Eske sala ketsek, burynǵy Ulttyq ekonomıka mınıstri, azamattyq nekedegi áıelin óltirdi dep aıyppen sottalǵan Qýandyq Bıshimbaevtyń týysy Baqytjan Baıjanov (ol da isti boldy) 2025 jyldyń shilde aıynda raqymshylyqqa ótinim berdi.
Burynǵy mınıstrdiń týysy Baqytjan Baıjanov 4 jylǵa bas bostandyǵynan aıyrylǵan edi.
