Saltanat Núkenovanyń esimi Qostanaıdaǵy memorıaldyq qabyrǵaǵa jazyldy
QOSTANAI. KAZINFORM — Eks-mınıstr Qýandyq Bıshimbaevtyń qolynan qaza tapqan Saltanat Núkenovanyń esimi memorıaldyq qabyrǵaǵa jazyldy. Bul týraly onyń aǵasy Aıtbek Amangeldi Instagram-daǵy paraqshasynda málim etti.
Aıtýynsha, marqumnyń esimi óńirdegi «Amangeldi» týrıstik keshenindegi memorıaldyq qabyrǵaǵa ornalastyrylǵan.
— Sapar Ysqaqov negizin qalaǵan «Amangeldi» týrıstik kesheninde Saltanattyń esimi jazylǵan memorıaldyq taqta ornalastyryldy. Budan buryn Pavlodardan topyraq jiberip, ony panteondaǵy memorıalǵa ornalastyrǵan edik. Joldaǵy ár shaqyrym men saǵat osy saparǵa turarlyq boldy. Bul bizdiń Saltanat týraly jańa ári qymbat esteligimiz bolyp qaldy, — dedi ol.
Osy oraıda Qostanaı oblysynyń Amangeldi aýdandyq ákimdigi baspasóz habarlamasyn jarııalady.
- 2020 jyldan bastap Qostanaı oblysy Amangeldi aýylynda metsenattyń bastamasymen kópfýnktsıonaldy týrıstik keshenniń qurylysy júrgizilip keledi. Búgingi kúni keshen aýmaǵynda pıramıda, «Al-Gambra» kafesi, «Brazılııa» qonaq úıi, Eıfel munarasynyń, Nıý-Iorktegi «Bostandyq músininiń», Meksıkadaǵy Maııa órkenıetiniń Chıchen-Itsa pıramıdasynyń kóshirmeleri, balalarǵa arnalǵan sport alańshalary jáne ózge de nysandar salynǵan.
Týrıstik hab aýmaǵynda «Ulttyq jady qabyrǵasy» atty memorıaldyq qabyrǵa ornalasqan. Onda tarıhı tulǵalardyń esimderi jazylǵan 296 eskertkish taqta ornatylǵan. Atalǵan memorıaldyq qabyrǵa 2024 jylǵy 23 mamyrda monýmentaldy óner nysandaryn ornatý jónindegi respýblıkalyq komıssııamen kelisilgen. Qazirgi ýaqytta memorıaldyq qabyrǵa jergilikti atqarýshy organnyń balansyna berilgen.
Sonymen qatar, metsenattyń jeke bastamasymen týrıstik keshen aýmaǵyndaǵy («Ulttyq jady qabyrǵasyna» qatysy joq) jeke menshik qaıyrymdylyq qoryna tıesili jabyq nysandardyń birinde tarıhı tulǵalar men oqıǵalardyń ataýlary jazylǵan birneshe ondaǵan taqta ornatylǵan. Sol taqtalardyń qatarynda Saltanat Núkenova esimi jazylǵan taqta da bar, - delingen aýdandyq ákimdik taratqan habarlamada.
Eske sala keteıik, 2024 jylǵy 13 mamyrda tek qazaqstandyqtardy ǵana emes, kórshi elderdi de eleń etkizgen Qýandyq Bıshimbaevqa qatysty sot protsesi aıaqtaldy. Sýdıa Saltanat Núkenovany óltirdi dep aıyptalǵan eks-mınıstrge 24 jyl jaza kesti. Al onyń týys inisi Baqytjan Baıjanov 4 jylǵa bas bostandyǵynan aıryldy.
Keıinnen Bıshimbaev marqum Saltanat Núkenovanyń otbasyna 17 mln teńge tóleıtini anyqtaldy.
Bıyl Qýandyq Bıshimbaevtyń týys inisi Baqytjan Baıjanov raqymshylyqpen bostandyqqa shyqty.
Al Qýandyq Bıshimbaev túrmede áli jumyssyz otyrǵany belgili boldy.