Saltanat Núkenova búgin 32 jasqa tolar edi

ASTANA. KAZINFORM – Búgin eks-sheneýnik Qýandyq Bıshimbaevtyń azamattyq nekede bolǵan jary Saltanat Núkenovanyń týǵan kúni. Ol Pavlodar qalasynda dúnıege kelgen.

Marqum tiri bolǵanda 32 jasqa tolar edi. S. Núkenova 2023 jyly 9 qarashada azamattyq nekedegi kúıeýi Qýandyq Bıshimbaevtyń qolynan qaza tapty.

«15.05.1992. Týǵan kúnińmen Saltık», - degen jazba qaldyrdy Saltanattyń aǵasy Aıtbek Amangeldi Instagram paraqshasynda.

Jazbanyń astynda jeli qoldanýshylary Saltanattyń máńgi este jáne júrekte qalatynyn aıtyp, pikir qaldyryp jatyr. Solardyń qatarynda qaza tabýshynyń quqyǵy men rýhyn qorǵaǵan advokattardyń biri Janna Ýrazbahova «Salta, sen bizdiń júregimizde eshqashan sónbeıtin ot qaldyrdyń», - degen jazba qaldyrypty.

Aıta ketsek, marqumnyń rýhyna arnalǵan Saltanat Núkenova atyndaǵy qor ashyldy. Maqsat – turmystyq zorlyq-zombylyq kórgen áıelderge kómek, qoldaý kórsetý.

«Ýaqyt óte kele Saltanat Núkenovany eske alý qorynyń jarǵysy men strategııalyq jumys josparyn jarııalaımyz. Qordy qurý biz úshin ádildik jolyndaǵy kúreste jáne turmystyq zorlyq-zombylyqtan zardap shekkenderge kómektesýde qısyndy qadam boldy. Barlyq qoldaýlaryńyz úshin rahmet», - dep jazylǵan qordyń jelidegi resmı paraqshasynda.

Eske sala keteıik, 13 mamyrda tek qazaqstandyqtardy ǵana emes, kórshi elderdi de eleń etkizgen Qýandyq Bıshimbaevqa qatysty sot protsesi aıaqtaldy. Sýdıa Saltanat Núkenovany óltirdi dep aıyptalǵan eks-mınıstrge 24 jyl jaza kesti.

Al onyń týys inisi Baqytjan Baıjanov 4 jylǵa bas bostandyǵynan aıryldy.

Óz kezeginde Qýandyq Bıshimbaev Saltanat Núkenovanyń týystarynan keshirim surady.