«Saltanat» memlekettik bı ansambli «Lazgı» festıvalinde ekinshi oryn ıelendi
ASTANA. KAZINFORM — 26-29 sáýir kúnderi Ózbekstannyń Hıva qalasynda ótken III halyqaralyq «Lazgı» bı festıvalinde «Saltanat» memlekettik bı ansambli Qazaqstan atynan óner kórsetti, dep habarlaıdy Mádenıet jáne aqparat mınıstrliginiń baspasóz qyzmeti.
Festıval aıasynda ansambl qazaqtyń «Qyz qýý», «Dombyra dastan» bılerin jáne ózbek halqynyń «Horezm termáleri» bıin sheber oryndap, kórermenniń yqylasyna bólendi. Nátıjesinde «Eń úzdik sahnalanǵan bı» atalymy boıynsha 2-oryndy ıelendi.
Aýqymdy mádenı is-sharaǵa álemniń 15 elinen kelgen óner ujymy qatysty. Olardyń qatarynda Qazaqstan, Qytaı, Úndistan, Reseı, Japonııa, Túrkııa, Indonezııa, Pákistan, Malaızııa, Ózbekstan, Belarýs, Ázerbaıjan, Qyrǵyzstan, Tájikstan jáne Túrikmenstan boldy.
Aıta keteıik, «Saltanat» memlekettik bı ansambli atalmysh halyqaralyq festıvalge alǵash ret qatysty.
Osyǵan deıin mańǵystaýlyq «Jorǵa» bı ansambli halyqaralyq baıqaýdyń bas júldesine ıe bolǵanyn jazǵanbyz.
