«Saltanat» memlekettik bı ansambliniń onlaın kontserti ótedi

NUR-SULTAN. QazAqparat - Búgin «Saltanat» memlekettik bı ansambliniń «Qazaq jáne álem halyqtarynyń bıleri» atty onlaın kontserti ótedi, dep habarlaıdy QazAqparat tilshisi.

Aıta keteıik, sonaý 1955 jyly Qazaq KSR halyq ártisi, Ýkraına KSR-niń halyq ártisi Lıdııa Chernysheva basshylyǵymen Qazaq KSR án-bı ansambli qurylǵan edi. Sodan ujym ár túrli festıvaldar men konkýrstarǵa belsendi túrde qatysyp tanyla bastaıdy. Búgingi tańda án-bı ansambli Qazaqstan Respýblıkasynyń «Saltanat» memlekettik bı ansambli bolyp qaıta quryldy.

QR eńbek sińirgen óner qaıratkeri, ansambliniń kórkemdik jetekshisi jáne bas baletmeısteri Gúlsáýle Orymbaevanyń jetekshiligimen óner ujymy Qazaqstan halyqtarynyń bılerin sahnadan jańa stılde, shynaıy poezzııa túrinde, ishki kúshi men sulýlyǵyn kórsete biledi.

Sheteldik kórermender men synshylar ujym jaıynda «Saltanat» ansambliniń kontsertin kórý, bul beıtanys elge baryp, onyń halqymen tanysqanmen birdeı» dep joǵary baǵa bergen.

Onlaın kontsertti búgin saǵat 19.00-de Mádenıet jáne sport mınıstrliginiń YouTube arnasynan kóre alasyzdar.

Foto: ansamblsaltanat.kz