Saltanat Baıqoshqarova: Ekstrakorporaldy uryqtandyrýǵa bólinetin kvota kólemin arttyrý qajet
ASTANA. QazAqparat - Qazaqstanda jylyna keminde 1 ret ekstrakorporaldy uryqtandyrýdan ótýge múmkindik jasaý qajet. Bul týraly búgin elordada ótip jatqan Qazaqstannyń reprodýktıvti medıtsına qaýymdastyǵynyń 9-shy halyqaralyq kongresi aıasynda BAQ ókilderine suhbat bergen «Ekomed» Adam urpaǵyn órbitý emhanasynyń ǵylymı dırektory Saltanat Baıqoshqarova aıtty, dep habarlaıdy QazAqparat.
Onyń aıtýynsha, Qazaqstanda memleket qarajaty esebinen ekstrakorporaldy uryqtandyrý alǵash ret 2010 jyly qolǵa alynyp, birinshi 100 kvota bólingen. Sodan beri jyl saıyn onyń kólemi artyp kele jatyr. Aǵymdaǵy jyly bıýdjetten 900 tsıklge (ekstrakorporaldy uryqtandyrýǵa) qarjy qarastyrylyp, ol oblystarǵa jáne Astana men Almaty qalalaryna bólingen.
«Biraq bul da jetkiliksiz. Óıtkeni qajettilik 10 ese kóp bolýy múmkin. Baǵasynyń qymbattyǵyn, ana aǵzasynyń arnaıy jaǵdaıǵa beıimdelýi kerektigin jáne joǵary tehnologııalardy eskerer bolsaq, bul ońaı emes. Kvota memlekettik jáne jeke klınıkalarǵa beriledi», - dedi ol.
Baıqoshqarovanyń deregine qaraǵanda, elimizde ekstrakorporaldy uryqtandyrýmen aınalysatyn 20 ortalyq tirkelgen. Alaıda olardyń tek 70-80 paıyzy ǵana belsendi túrde jumys isteıdi. Sonymen qatar ol tegin medıtsınalyq kómektiń kepildendirilgen kólemi aıasynda ekstrakorporaldy uryqtandyrýǵa bólinetin kvota kólemin arttyrý jáne qajet dep esepteıtindigin basa aıtty.
«Keleshekte mindetti áleýmettik medıtsınalyq saqtandyrýdy engizý kvota alý múmkinshiligin keńeıtýge járdemdesetin bolady. Máselen, Reseıde mindetti áleýmettik medıtsınalyq saqtandyrýdyń arqasynda adamdar ekstrakorporaldy uryqtandyrýdan jylyna eki ret ótý múmkindigin alyp otyr. Menińshe, bolashaqta Qazaqstanda da jylyna tym bolmaǵanda bir ret tegin kvota alý múmkinshiligi jasalatyn bolady»,- dedi «Ekomed» Adam urpaǵyn órbitý emhanasynyń ǵylymı dırektory.
