«Salt-dástúrimizde eshqashan bolmaǵan»: Prezıdent betten súıip amandasýdy synǵa aldy
ASTANA. KAZINFORM – Memleket basshysy Qasym-Jomart Toqaev Qazaqstanda jańa júris-turys ádebi men qoǵamdyq mádenıet qalyptastyrý qajettigin aıtty.
Prezıdent er adamdardyń bir-birin qushaqtap, súıip amandasýy, sondaı-aq áıelder men erlerdiń amandasý kezinde bir-birin betinen súıýi qazaqtyń dástúrine jat ekenin atap ótti.
Jýrnalıst Memleket basshysynyń azamattardyń júris-turysynyń jańa mádenıeti men qoǵamdyq etıka qalyptastyrý týraly bastamasyna qatysty suraq qoıdy. Onyń ishinde ózgege qurmet kórsetý, zań men tártipti saqtaý, ózin syılaý jáne jaýapkershilik tanytý kúndelikti daǵdyǵa aınala ma degen saýal qoıyldy.
Prezıdent bul bastamany naýqan retinde emes, naqty iske baǵyttalǵan usynys retinde kótergenin aıtty.
– Bilseńiz, bul iske ózim bastamashy boldym. Naýqanǵa emes, naqty iske. Óıtkeni jastardyń, egde adamdardyń júris-turysyna qarap, baıyrǵy dástúrli qundylyqtarymyzǵa oralý qajet degen sheshimge keldim. Er adamdardyń bir-birin qushaqtap, súıip amandasýy, sálemdesý barysynda áıelderdiń erkekterdi, erkekterdiń áıelderdi betinen súıýi durys emes, – dedi ol.
Memleket basshysynyń aıtýynsha, mundaı qylyq salt-dástúrimizde eshqashan bolmaǵan.
– Ásirese, áskerı forma kıgenderdiń, generaldardyń osylaı istegeni kózge oǵash kórinedi. Bul ne masqara? Keńes Odaǵy marshalynyń, Dúnıejúzilik soǵysta, Uly Otan soǵysynda jeńiske jetken marshaldardyń osyndaı qylyq kórsetkenin elestete alasyzdar ma? Erkekter qolynyń ushyn ustata salmaı, qoldy qattyraq qysyp amandasýy kerek. Sál jymısa ǵana jetkilikti. Árqashan solaı bolǵan. Tipti, osy adamdy kórgenińizge shyn máninde qýanyshty bolsańyz, oń qolyńyzdy keýdeńizge qoıyp amandasyńyz. Ómirde mundaı jaıt jıi kezdesedi. Sondyqtan men jańa júris-turys ádebi týraly másele kóterdim, – dedi Qasym-Jomart Toqaev.
Prezıdent júris-turys ádebimen qatar, qoǵamda tazalyq pen tártip mádenıetin dáripteý qajettigin kóterdi.
– Qolymyzdan kelmeıdi dep kim aıtty?! Biz de jasyl jelekti jaqsy kóremiz. Qazir Astanada, basqa qalalarda, aýdandar men oblystyq mańyzy bar shaharlarda oń ózgeristerge kýá bolyp júrsizder. Biz óńir basshylaryna joǵary talap qoıdyq. Osy ispen túpkilikti aınalysamyz. Óıtkeni tazalyq degendi týra maǵynasynda ǵana emes, oı-sananyń, jan dúnıeniń tazalyǵy dep túsingen jón. Belgili tulǵalardyń biri aıtqandaı, oı tazalyǵy boı tazalyǵymen de ushtasqany jón. ıAǵnı biz mádenıetti, taza ultqa aınalýymyz kerek. Sonda ǵana kúlli álemge tanylamyz, – dedi el Prezıdenti.
Buǵan deıin Q. Toqaev «Vıtse-prezıdent kim bolady?» degen suraqqa jaýap bergen edi.
Oǵan qosa, Memleket basshysy Úkimettiń otstavkaǵa ketetinin jáne quramynda birqatar ózgeris bolatynyn málimdedi.
