Salt atty saıahatshylar Bozoqtan Botaıǵa deıin ekspedıtsııaǵa shyqty
NUR-SULTAN. QazAqparat – At týrızmin qoldaýshy shabandozdar Aqmola jáne Soltústik Qazaqstan oblystarynyń kıeli jerlerine saıahatqa shyqty, dep habarlaıdy QazAqparat Mádenıet jáne sport mınıstrligine silteme jasap.
Jeti kúndik ekspedıtsııanyń maqsaty – Bozoq qalashyǵy men Botaı mádenıeti syndy jalpyulttyq mańyzy bar arheologııalyq eskertkishin tanymal etý, sondaı-aq Qazaqstan aýmaǵynda ekologııalyq týrızmdi ilgeriletý.
«Osy dalada adamzat alǵash ret atty qolǵa úıretti. Botaı mádenıeti – sol uly órkenıettiń bastaýy. Bozoq qalashyǵy – eńseli elordamyzdyń altyn tamyry. Bul jerde ulttyq park qurý arqyly biz kóne tarıhymyzdy jas urpaqqa nasıhattaımyz. Mádenıet jáne sport mınıstrligi ashyq aspan astyndaǵy ulttyq mýzeı qurylysyn kezeń-kezeńmen júzege asyrýdy kózdeıdi. Aldaǵy ýaqytta da «Bozoq» mýzeı-qoryǵynyń jumysy jandana beredi. Soltústik Qazaqstan men Aqmola oblystarynyń arasyn atpen júrip ótetin ekspedıtsııanyń máni erekshe. Osyndaı is-sharalar arqyly atqa minýdi nasıhattaımyz, tarıhymyzben tanysamyz, eko-týrızmdi damytamyz. Ekspedıtsııany uıymdastyrýǵa úles qosqan barshańyzǵa alǵys aıtamyn»
, – dedi mádenıet jáne sport mınıstri Dáýren Abaev.
Aıta ketsek, Bozoq – Qazaqstannyń qazirgi astanasy aýmaǵynda ornalasqan, 1250 jyldyq tarıhy bar kóne qalashyq. Kezinde Bozoq arqyly Uly Jibek jolynyń saýda tarmaqtary ótken.
Al, Botaı – ertedegi Eýrazııa jylqy ósirýshileriniń biregeı qonysy. Bul mádenıettiń ómir súrý ýaqyty b.ǵ.d. V-IV ǵasyrlarda ótti. Onda júrgizilgen zertteýlerdiń tarıhı mańyzy – jylqylardy qolǵa úıretýdiń jer júzindegi birden-bir ortalyǵy Qazaqstan ekenin dáleldeıdi.
