Salt atty polıtseıler saıajaılardy patrýldeýge kóshti
PETROPAVL. QazAqparat – Soltústik Qazaqstan oblysynda atty saqshylar saıajaılardy patrýldeýge kóshti, dep habarlaıdy QazAqparat Polisia.kz saıtyna silteme jasap.
6 sáýirden bastap salt atty polıtseıler Petropavldyń Zarechnoe jáne Novopavlovka kentterindegi saıajaı qoǵamdastyqtarynda tártipti qadaǵalaýǵa kiristi. Olar saıajaı qoǵamdastyqtarynyń tóraǵalarymen, kúzet qyzmetimen baılanys ornatyp, ýchaskelerdegi jaǵdaımen tanysty.
«Biz tótenshe jaǵdaı rejıminiń erejelerin saıajaı qoǵamdastyqtarynyń tóraǵalaryna túsindiremiz. Azamattar densaýlyqtaryn saqtap, ózderin oqshaýlaýy tıis. Pandemııa órship turǵandyqtan bir jerde úsh adamnan artyq jınalmaý, eki metrdeı araqashyqtyqty saqtaý qajet ekenin eske salamyz. SQO Bas sanıtarlyq dárigeriniń qaýlysyna sáıkes, úıden tek jumysqa, jaqyn mańdaǵy dúken men dárihanaǵa shyǵýǵa, sondaı-aq qoqys shyǵarýǵa bolady. Saıajaılar bul tizimge kirmeıdi. Sondyqtan basyńyzdy qaterge tigip, táýekelge barýdyń qajeti joq», – deıdi Petropavl qalalyq Polıtsııa basqarmasynyń JPQB quramyndaǵy kavalerııa vzvodynyń komandıri Jaqsylyq Qojeldaqov.
Málim etilgendeı, óńirde kóktemgi sý tasqyny qaýpi bar. Saıajaı ýchaskelerine sý kenetten kelip qalýy múmkin bolǵandyqtan, únemi saq bolǵan jón.
Salt atty saqshylardyń baǵyttary 17 saıajaı qoǵamdastyǵynyń aýmaǵy arqyly ótedi. Koronavırýs boıynsha jarııalanǵan tótenshe jaǵdaı rejımine baılanysty saıajaı maýsymy keıinge shegerildi. Degenmen de, saıajaı urlyqtaryn boldyrmaý mańyzdy mindetterdiń biri bolyp tabylady. Saıajaı ýchaskeleri baý-baqsha maýsymy aıaqtalǵansha tártip saqshylarynyń baqylaýynda bolady.
