Salt atpen saıahatqa attanǵan majarlyqtar Shyǵys Qazaqstanǵa jetti
ÓSKEMEN. QazAqparat - Majarlyq dáriger Ishtvan Bentse eki otandasymen birigip, salt atpen Uly Jibek jolynyń boıyn sharlap, 5 jyldyq ekspedıtsııaǵa attanǵan bolatyn. Bul jazda saıahatshylar túrki órkenıeti qalyptasqan Shyǵys Qazaqstanǵa bardy, dep habarlaıdy QazAqparat tilshisi óńirdiń aqparat ortalyǵyna silteme jasap.
Uly Jibek joly myńdaǵan jyldar boıy Azııa men Eýropany jalǵaǵan altyn kópir boldy. Qos qurlyqtyń mádenı jáne ekonomıkalyq araqatynasy bul joldy meken etken halyqtardyń tirshiligine yqpalyn tıgizbeı qoımady.
Ekspedıtsııanyń birinshi kezeńi 2016 jyly bastaldy. Ǵundar kezeńindegi kıimderge oranǵan salt attylar Majarstannan Ázirbaıjannyń astanasy - Bakýge deıin jetken.
Osy jazda salt attylar ekspedıtsııany «Astanadan Shyńǵyshan ımperııasynyń ordasy - Qaraqorymǵa deıin» uranymen jalǵastyrdy. Saıahatshylar Qazaqstannyń shyǵys óńirlerin túgel qamtyp, Ereımentaý - Ekibastuz - Pavlodar - Semeı - Abaı aýdany - Jarma aýdany - Óskemen - Úlken Naryn - Qaton-Qaraǵaı baǵyttarymen júrip ótedi. Shyǵys Qazaqstandy aralaý kezinde majarlar Qońyr-Áýlıe úńgiri, Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıi, Berel qorǵandary, Ashyq aspan astyndaǵy «Shyny Sarkofag» syndy tarıhı jerlerdi aralady. Sondaı-aq, ekspedıtsııa músheleri O. Bókeıdiń mýzeı-úıine, A.Erejepuly atyndaǵy mýzeı-mektebine baryp, Qarataı batyrǵa arnalǵan eskertkishti tamashalady. Ár aýdannyń turǵyndary jolaýshylarǵa ulttyq astan dám tatqyzyp, qazaq halqynyń salt-dástúrimen, oıyndarymen tanystyryp ótti. Osy ýaqyt ishinde majarlyq qonaqtar Shyǵys Qazaqstannyń tabıǵatyna erekshe tánti boldy.
«Biz tek osy óńirdiń óziniń ártúrli tabıǵı aımaqtarynda boldyq. Shól jáne shóleıt jerlerdi, qazaqtyń keń dalasyn aralap, taýlardy tamashaladyq. Tabıǵattyń sulýlyǵyn sózben aıtyp jetkizý múmkin emes», - dep bólisti Ishtvan Bentse.
Ekspedıtsııa Qazaqstannan keıin Mońǵolııada jalǵasyn tabady. Saıhatshylardyń aıtýynsha, osynshama uzaq joldy ótkerýde Qazaqstannyń qonaqjaı, meıirimdi halqy únemi kómektesip turatyn kórinedi.
