«Salonnan kólik alý úshin onyń 30% aldyn ala tóleý» - mınıstr máseleni anyqtamaq

ASTANA. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev elimizde shyǵarylatyn avtokólikke qatysty pikir bildirdi, dep habarlaıdy QazAqparat tilshisi.

«Byltyr 80 myńnan asa kólik shyǵarsaq, bıyl 11 aıda 90 myńnan astam kólik shyǵaryldy. Negizi, jyl aıaǵyna deıin 110 myń kólikke jetedi. Kelesi jyly kórsetkishti 135 myńǵa deıin kótereıin dep otyrmyz. Alaıda bul kórsetkish áli de ósýi múmkin. Óıtkeni halyqtyń arasynda suranys óte joǵary. Memleket basshysy Almatyǵa jumys sapary aıasynda úsh zaýyttyń (Changan, Chery, Haval) irgetasyn qalaý rásimine qatysty. Onda 3 myqty kompanııanyń zaýyty ashylady degen jospar bar. Zaýyttar 1,5 jyldyń ishinde salynady», - dedi Q. Óskenbaev Senattyń jalpy otyrysynan keıin tilshiler saýalyna jaýap bere otyryp.

Sonymen qatar tilshiler mınıstrden Hyundai men Kia kólikterin alý úshin avtosalonda kezekke turý máselesi jaıynda suraq qoıdy

«Kezekke turaıyn deseń, onyń 30%-yn aldyn ala tóleý kerek ekensiń. Muny avtosalondar sońǵy kezderi ózderi shyǵaryp alǵan. Bul talap qanshalyqty zańdy? Avtosalondar sondaı talap qoıa ala ma?», - dep surady tilshi.

Óz kezeginde Q. Óskenbaev bul máselege qatysty memlekettik organdar talqylaý júrgizetinin aıtty.

«Siz aıtyp otyrǵan máseleni men de estidim. Qazir jańa noý-haý deıdi ǵoı, avtosalondar sondaı ózgerister engizip jatyr. Qazir biz memlekettik basqarý organdarmen munyń kimniń quzyretine qaraıtytyny aqyldasamyz. Keıin resmı túrde bul máselege qatysty jaýap beremiz», - dedi vedomstvo basshysy.

Budan buryn habarlanǵandaı, bıyl qarasha aıynda Prezıdent Qasym-Jomart Toqaev mýltıbrendti avtomobıl zaýytynyń irgetasyn qalaý rásimine qatysty.