Salmaǵy 25 tonnadan asatyn kólikterdiń jolǵa shyǵýyna salynatyn tyıym 2027 jylǵa shegerilýi múmkin

ASTANA. KAZINFORM — Salmaǵy 25 tonnadan asatyn aýyr júk kólikteriniń jolǵa shyǵýyna salynatyn tyıym kezeń-kezeńmen qoldanysqa enetin boldy. Bul týraly Kólik mınıstri Nurlan Saýranbaev Úkimet otyrysynan keıin ótken baspasóz máslıhatynda málim etti.

— Bul o basta depýtattardyń usynysy bolatyn. Bizdiń joldar bir oske túsetin salmaǵy 8 tonna bolatyn kólikterdi ǵana kótere alady. Siz aıtyp otyrǵan Howo sııaqty kólikter tek karerde júrýge arnalǵan. Onyń salmaǵy 60 tonnaǵa deıin jetedi. Endi solar tasjolǵa shyqsa, bir jyldyń ishinde joldardy búldirip alamyz. 1 trln teńgeni jolǵa jumsap, ony 1 kúnde qurtyp alýǵa bolady. Durys emes qoı. Ondaı kólik vagon degen sóz ǵoı. Tasjolǵa shyǵýyna bolmaıdy. Depýtattar osyndaı usynys aıtqanda qoldadyq, — dedi ol.

Resmı derek boıynsha, Qazaqstanda bul sanatqa jatatyn 36 myńnan astam kólik tirkelgen. 

— Kezinde osyndaı kólik satyp alǵan adamdar kóp boldy. Sony eskerip, bastapqy sheshimdi sál ózgerttik. Tyıymdy 1 qańtardan bastamaımyz, kezeń-kezeńmen engizemiz. Basynda úlken qalalarǵa kirgizbeımiz, odan keıin oblys ortalyqtaryna tyıym qoıamyz. Astananyń ózinde osyndaı kólikter júr. Qalanyń joly oǵan arnalmaǵan, sondyqtan joldyń byt-shytyn shyǵarady. Olaı bolmaıdy. Teńgerim tabý úshin osyndaı sheshim qabyldadyq. Kólik ıelerine júk tıeıtin bortty alasartýǵa ruqsat beremiz. Biraq ondaı úlken kólikter jolmen júrýine bolmaıdy. Árıne, olar óz nápaqasyn aıyryp otyr. Biraq ol halyq júretin jolǵa zııan keltirmeý kerek. Jol — halyqtyń baılyǵy. Ondaı kólikter tek karerde júrý kerek. Al tasjolǵa shyqqysy kelsek, bortty kishireıtý kerek. Osylaısha kezeń-kezeńmen iske asyramyz. Tolyq tyıym 2027 jyldyń 1 qańtaryna qalýy múmkin, — dedi Nurlan Saýranbaev.

Sondaı-aq, ol «Qazaqstan temir joly» ulttyq kompanııasy men amerıkalyq Wabtec kompanııasy arasyndaǵy 4,2 mlrd dollarlyq kelisimshart týraly pikir bildirdi.