Sall-ortalyq: SQO-da shetel nómiri bar kólik ıelerinde qandaı suraqtar týyndaýda

PETROPAVL. QazAqparat – Soltústik Qazaqstan oblysynda polıtseıler shetel nómirleri bar avtokólik júrgizýshilerine arnalǵan Sall-ortalyq quryp, oǵan bir táýlikte 50-ge jýyq qońyraý tústi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, qarashanyń 10-y SQO polıtseıleri shetel nómirleri bar avtokólikterdi paıdalaný jáne tirkeý máseleleri boıynsha Sall-ortalyq jumysyn iske qosty. Bir táýlik ishinde oǵan oblystyń 50-ge jýyq turǵyny habarlasqan. Kólik júrgizýshileri negizinen avtokólikteriniń paıdalanýǵa tyıym salynǵan kólikter tiziminde bolýy, ne bolmaýy týraly surap bilgen. Eger avtokóliktiń sheteldegi ıesi tirkeýden shyǵarsa, avtomashına bul tizimge kiredi. «Jol júrisi erejesi týraly» QR Zańynyń 63-babyna sáıkes, tirkelmegen kólik quralyn el aýmaǵynda paıdalanýǵa tyıym salynady. Tizimde barsyz degen jaýap alǵandar qazirgi epıdjaǵdaıdy eskerip, qaıta tirkeýge turý úshin shetelge kólikterin shyǵarýǵa bolatyny, ne bolmaıtyny jaıly surastyrdy.

«Shekarany kesip ótý boıynsha keńes berýge polıtseılerdiń ýákilettiligi joq ekendigin eske salamyz. Bul másele boıynsha UQK SQO boıynsha departamentine júgingen jón. Turǵyndardan túsken saýaldardyń qatarynda shetel nómirli kólikterge qatysty túrli másele boldy. Máselen, oblys turǵyny kóliginiń sheteldegi ıesi qaıtys bolǵan jaǵdaıda ne isteýge bolatynyn surady. Oǵan múliktiń muragerin izdep tabý qajet degen jaýap berildi. Sondaı-aq, shetel nómiri bar avtokólikti aıyp turaǵynan qalaı alýǵa bolatynyn suraǵandar bar. Aıyp turaǵynan alý úshin aıyppuldy ótep, quqyq belgileıtin qujattaryn: júrgizýshi kýáligin, avtokólikti tirkeý týraly kýálikti, ıaǵnı tehpasportty, saqtandyrý polısin kórsetýi tıis. Basty shart – kólik urlanǵandar sanatynda bolmaýy kerek», - deıdi SQO PD ákimshilik polıtsııa basqarmasynyń bastyǵy Serik Áljanov.

SQO-daǵy Call-ortalyq saǵat 9.00-den 23.00-ge deıin 8 7152 61-25-42 nómirinde jumys isteıdi.