Salqyn sýǵa uzaq ýaqyt shomylý paıdasyz ári densaýlyqqa qaýipti - Vladımır Bekker
«Shomylýǵa qatysty birqatar keńes bergim keledi. Salqyn ne bolmasa sýyq sýǵa uzaq ýaqyt shomylýdyń esh paıdasy joqtyǵymen qatar densaýlyqqa qaýip tóndiredi. Biz sýdyń temperatýrasyna baılanysty sýǵa shomylý rejımin ustanýǵa keńes beremiz. Sý temperatýrasy +18 gradýs bolǵanda - 6-8 mınýt, +20 gradýsta - 10-12 mınýt, +20 gradýstan joǵary bolǵanda - 15 mınýtqa deıin ǵana shomylý kerek», - dedi komıtet basshysy.
Jyl basynan beri oryn alǵan qaıǵyly jaıttarǵa toqtalǵan Vladımır Bekkerdiń dereginshe, osy ýaqytqa deıin 62 adamnyń, onyń ishinde 22 balanyń ajaly sýdan bolyp otyr. Onyń ishinde 24 adam - balyq aýlaý kezinde, 13 adam - qatty aǵysqa, ıirilmge tap bolyp nemese aıaǵy tartylyp batyp ketken. 10 bala sýǵa qulap jantásilim etse, ishimdik ishken 9 adamnyń ajaly sýdan boldy.
«Ókinishke qaraı, elimizde sýǵa ketý deregi joǵary bolyp tur. Eresekterdiń kishkentaı balalardy qaraýsyz qaldyratyny alańdatady. Sonyń kesirinen balalar aryqqa, arnaǵa, sý qoımalaryna qulap ketip mert bolady. Ótken táýliktiń ózine 14 adam sýǵa ketse, sonyń altaýy - balalar», - dedi V.Bekker.