Salynyp jatqan úıden páter almas buryn osy 5 nárseni mindetti túrde tekserińiz
ASTANA. KAZINFORM — Qurylys kezeńinde páter satyp alý qujattar men mámile talaptaryn muqııat tekserýdi qajet etedi, dep habarlaıdy Qurylys jáne turǵyn úı-kommýnaldyq sharýashylyq isteri komıtetiniń baspasóz qyzmeti.
— Qazaqstanda kóppáterli turǵyn úılerdiń qurylysyn salý úshin azamattardyń qarajatyn tartý «Turǵyn úı qurylysyna úlestik qatysý týraly» Qazaqstan Respýblıkasynyń Zańymen retteledi. Qarajatty salmas buryn tańdalǵan nysannyń zań talaptaryna sáıkes iske asyrylyp jatqanyna kóz jetkizińiz, — deıdi komıtet mamandary.
Qarajat tartýdyń zańda kózdelgen qandaı tásilderi bar?
Azamattardyń qarajaty myna negizderdiń biri bolǵan jaǵdaıda tartylýy múmkin:
— Biryńǵaı operatordyń kepildigi bolǵan kezde;
— ekinshi deńgeıdegi banktiń jobany iske asyrýǵa qatysýy arqyly;
— kóppáterli turǵyn úıdiń qańqasy turǵyzylǵannan keıin úleskerlerdiń qarajatyn tartý arqyly.
Eger qurylys salýshyda azamattardyń qarajatyn tartýǵa zańda kózdelgen negiz bolmasa, salynyp jatqan úıdegi páter úshin tólem jasamaý qajet.
Satyp almas buryn neni tekserý kerek?
1. Qurylys salýshy men nysandy
Kompanııa, turǵyn úı kesheni jáne onyń qurylysyna qatysty qujattar týraly aqparatty zerdeleńiz.
2. Qarajat tartý negizin
Jobanyń zańda kózdelgen tetikterdiń biri arqyly iske asyrylyp jatqanyna kóz jetkizińiz.
3. Shartty
Páterdiń qunyna, tólem jasaý tártibine, qurylysty aıaqtaý jáne turǵyn úıdi tapsyrý merzimderine, sondaı-aq taraptardyń quqyqtary men mindetterine qatysty talaptarmen muqııat tanysyńyz.
4. Sharttyń tirkelýin
Úleskerlerdiń qatysýy týraly shart belgilengen tártippen tirkelýge tıis.
Sharttyń nysanyna nazar aýdaryńyz
Páter satyp alý kezinde aldyn ala sharttar, brondaý sharttary, ınvestıtsııalyq kelisimder jáne basqa da qujattar usynylýy múmkin.
— Sharttyń ataýy mámileniń zańdylyǵyn ózdiginen aıqyndamaıdy. Eger qujat is júzinde kóppáterli turǵyn úı qurylysyna azamattardyń qarajatyn zańda belgilengen tetikterdi aınalyp ótip tartý úshin paıdalanylsa, mundaı shemaǵa jol berilmeıdi, — deıdi komıtettegiler.
Aqparatty qaıdan tekserýge bolady?
Mámile jasamas buryn turǵyn úı kesheni men qurylys salýshy týraly málimetterdi resmı tsıfrlyq servıster arqyly tekserý usynylady.
Turǵyn úı nysandary týraly aqparat Homeportal.kz portalynda qoljetimdi. Sondaı-aq málimetterdi eGov, Halyk, Alatau, BTsK jáne Eýrazııalyq bank sııaqty tıisti memlekettik jáne tsıfrlyq servıster arqyly tekserýge bolady.
Qarajatty zańsyz tartqany úshin qandaı jaýapkershilik qarastyrylǵan
Zańnama talaptaryn buzǵany úshin ákimshilik jaýapkershilik kózdelgen:
— jeke tulǵalarǵa — 200 AEK;
— shaǵyn kásipkerlik sýbektilerine — 500 AEK;
— orta kásipkerlik sýbektilerine — 750 AEK;
— iri kásipkerlik sýbektilerine — 1 000 AEK;
— iri kásipkerlik sýbektileri talaptardy qaıtalap buzǵan jaǵdaıda — 2000 AEK.
Tólem jasamas buryn — qysqasha chek-paraq
— Qurylys salýshy men turǵyn úı kesheri tekserildi;
— qarajat tartýdyń zańdy negizi anyqtaldy;
— shart muqııat zerdelendi;
— úlestik qatysý týraly shart tirkelgen;
— tólem jasaý tártibi shart talaptaryna sáıkes keledi.
— Negizgi qaǵıda: aldymen tekserińiz — sodan keıin tólem jasańyz. Mámile jasalǵanǵa deıin aqparat pen qujattardy muqııat tekserý salynyp jatqan turǵyn úıdi satyp alý kezinde táýekelderdi azaıtýǵa múmkindik beredi, — dep túıindedi vedomstvonyń baspasóz qyzmeti.
Budan buryn Qostanaıda ondaǵan otbasy baspanasyz qalǵanyn jazǵanbyz.
