Salynyp jatqan úıden Otbasy bank arqyly ıpoteka rásimdeý: Qandaı talap qoıylady
ASTANA. KAZINFORM — QR ÓQM Qurylys jáne turǵyn úı kommýnaldyq sharýashylyq isteri komıteti tóraǵasy Baqytjan Júnisbekov qurylys kompanııalarynyń «Qazaqstan turǵyn úı kompanııasy» AQ kepildigin alýy páter satyp alýshylardyń quqyǵyn qorǵaý mehanızmin aıtarlyqtaı nyǵaıtatynyn aıtty.
— Qurylys salýshy men ýákiletti kompanııa kepildik alý úshin «Qazaqstan turǵyn úı kompanııasy» AQ-ǵa (QTK) júginip, jobanyń zańdyq tazalyǵyn, ekonomıkalyq oryndylyǵyn jáne taraptardyń qarjylyq turaqtylyǵyn rastaıtyn qajetti qujattar paketin usynady. QTK jobaǵa keshendi baǵalaý júrgizedi, oǵan tehnıkalyq-ekonomıkalyq, qarjylyq jáne zańdyq saraptama, sondaı-aq táýekelder men qarjylandyrý qurylymyn taldaý kiredi. Kepildik berý týraly shartqa qol qoıylǵanǵa deıin ýákiletti kompanııa bas merdigermen shart jasasýǵa jáne «QTK» AQ men ınjınırıngtik uıymmen úshjaqty kelisimge qol qoıýǵa mindetti. Injınırıngtik uıym tehnıkalyq qadaǵalaýdy, qurylys-montaj jumystarynyń merzimi men kólemin baqylaýdy, sondaı-aq úleskerlerdiń qarajatyn maqsatty paıdalaný monıtorıngin júzege asyrady, — dedi ol OKQ alańyndaǵy baspasóz máslıhatynda.
Sondaı-aq ol barlyq aldyn ala rásimder aıaqtalǵannan keıin QTK men ýákiletti kompanııa arasynda kepildik berý týraly shart jasalyp, onda taraptardyń mindettemeleri men kepildik jaǵdaıyn taný sharttary bekitiletinin aıtty.
— Biryńǵaı operatordyń kepildigi úleskerge qosymsha múliktik kepilzatsyz-aq salynyp jatqan turǵyn úıge ıpotekalyq nesıe rásimdeýge, sondaı-aq «Otbasy banki» júıesiniń quraldary arqyly zeınetaqy jınaqtaryn paıdalanýǵa múmkindik beredi. Osylaısha, kepildik tetigi úleskerlerge senimdi quqyqtyq qorǵaýdy, qurylys qarjylandyrýynyń ashyqtyǵyn jáne qurylys salýshyda qarjylyq táýekelder týyndaǵan jaǵdaıda jobanyń aıaqtalýyn qamtamasyz etedi, — dedi Baqytjan Júnisbekov.
Eske salsaq, 30 maýsymda Memleket basshysy «Qazaqstan Respýblıkasynyń keıbir zańnamalyq aktilerine turǵyn úı qurylysyna, avtomobıl joldaryna úlestik qatysý jáne múgedek adamdardy tasymaldaý boıynsha qyzmetter kórsetý máseleleri boıynsha ózgerister men tolyqtyrýlar engizý týraly» QR Zań qabyldandy. Jańa zań elimizde turǵyn úı qurylysyna úlestik qatysý salasyndaǵy syn-qaterlerdi azaıtyp, qurylys salýshylardyń josyqsyz tájirıbesin retteýge baǵyttalǵan normalar bar.
Sondaı-aq jańa zańǵa saı, endi qurylys kompanııasynan qolma-qol aqshaǵa páter nemese turǵyn emes jaı satyp alýǵa tyıym salynady. Ol turǵyn úı alypsatarlyǵynyń aldyn alý úshin jasalyp jatyr.