Salymshylardyń aqshasyna kólikter satyp alǵan: belgili qarjy pıramıdasynyń qyzmeti toqtady

ASTANA. KAZINFORM – Qarjylyq monıtorıng agenttiginiń Qyzylorda oblysy boıynsha departamenti «HRT» ataýymen belgili qarjy pıramıdanyń qyzmetin toqtatty.

Uıymdastyrýshylar azamattarǵa zańdy ınvestıtsııalyq joba retinde usynylǵan shemany jarnamalap, oǵan elektrosamokattardy satyp alý jáne olardy Eýropa elderinde jalǵa berý arqyly paıda tabýǵa bolady dep sendirgen.

Jobaǵa qatysý úshin adamdardan arnaıy «HRT» shotyna krıptovalıýta aýdarý talap etilgen.

Negizgi shart — kem degende eki jańa salymshy tartý.

— 200-den astam azamat jobaǵa 50 myńnan 35 myń AQSh dollaryna deıingi qarajattaryn salyp, aı saıyn 1 200 AQSh dollaryna deıin syıaqy alyp otyramyz dep úmittengen. Zańsyz alynǵan kiristiń jalpy somasy 28 mln teńgeden asty. Tergeý barysynda kúdiktiler salymshylardyń aqshasyna eki avtokólik — «BMW 530I Xdrive» jáne «Changan Alsvin» satyp alǵany anyqtaldy. Atalǵan kólikterge sot sanktsııasy boıynsha tyıym salyndy, — delingen habarlamada.

Kúdiktilerge qatysty úıqamaq retindegi bultartpaý sharasy qoldanyldy.

— Sonymen qatar qazirgi ýaqytta «HRT» qarjy pıramıdasynyń qurylymdyq bólimshelerin elimizdiń jeti óńirinde — Aqtóbe, Almaty, Atyraý, Jambyl oblystarynda, sondaı-aq Astana jáne Almaty qalalarynda qurý faktisi boıynsha sotqa deıingi tergep-tekserý júrgizilip jatyr, — delingen QMA habarlamasynda.

QPK-niń 201-babyna sáıkes ózge málimetter jarııalaýǵa jatpaıdy. 

Aıta ketelik Shyǵys Qazaqstanda 6 qarjy pıramıdasy halyqqa 400 mln teńgeden astam zalal keltirgeni týraly jazǵan edik.