Salyqtyń kólemi kem degende 20 paıyzǵa ońtaılandyrylady

Bıznes sýbektileriniń salyqtyq esebin 30 paıyzǵa azaıtý josparlanyp otyr. Bul týraly «Altyn Sapa» jáne «Paryz» syılyqtarynyń ıegerlerin marapattaý rásiminde Prezıdent Qasym-Jomart Toqaev aıtty, dep habarlaıdy Kazinform.

«Úkimet pen bıznes-qoǵamdastyq birlesip, kásipkerlikti damytýǵa kedergi keltiretin artyq talaptardy anyqtaý úshin aýqymdy jumystar júrgizdi. Sonyń nátıjesinde, 10 myńnan astam zań normasy jańa retteýshi saıasattyń negizgi talaptaryna saı kelmeıtini anyqtaldy. Búginde onyń 90 paıyzy kúshin joıdy. Qalǵany jyl sońyna deıin retke keltiriledi. Syn-qaterlerdi basqarýdyń avtomattandyrylǵan júıesi baqylaýshy organdardyń bızneske qysymyn shekteýdiń mańyzdy quralyna aınalady. Ol 2024 jyldyń 1 qańtarynan bastap iske qosylady jáne adamnyń qatysýynsyz tekserýdi belgileýge múmkindik beredi. Nátıjesinde, bızneske josparly ınspektsııa jasaý eki ese qysqarady. Al aıyppuldar sany birneshe ese azaıady», - dedi Qasym-Jomart Toqaev.

Memleket basshysynyń atap ótýinshe, bıznes pen memleket arasyndaǵy qatynastardyń júıeli túrde jańǵyrýyna qazir ázirlenip jatqan jańa Salyq kodeksi yqpal etedi.

Atap aıtqanda, onda fıskaldy organdardy ákimshilendirýdiń servıstik modeline kóshirý máselesi qamtylady.

«Bıznes sýbektileriniń salyqtyq esebin 30 paıyzǵa azaıtý josparlanyp otyr. Salyqtyq tólemder sany kem degende 20 paıyzǵa ońtaılandyrylady. Kólik quraldaryna arnalǵan salyq boıynsha esep aıyrysý men deklaratsııa, sondaı-aq jer men múlik salyǵyna qatysty júkteme bir mıllıon teńgeden az bolsa, esep aıyrysý alynyp tastalady. Kásipkerlerdiń bankterdegi shottaryn buǵattaý kezinde olardyń salyqtyq qaryzyna teń kólemdegi qarjysyna ǵana shekteý qoıylady»», - dedi Prezıdent.