Salyqtyq buzýshylyqtar men táýekelderdi jasandy ıntellekt anyqtaıdy – mınıstr
ASTANA. KAZINFORM – QR Qarjy mınıstri Mádı Tákıev salyqtyq jáne kedendik ákimshilendirýdegi jańa tsıfrlyq sheshimder týraly aıtyp berdi.
«Prezıdent tapsyrmasymen Memlekettik kirister komıtetiniń barlyq aqparattyq júıelerine, táýelsiz IT-aýdıt júrgizý boıynsha jumys bastaldy. Onyń nátıjesi boıynsha Memlekettik kirister komıtetiniń jańa aqparattyq arhıtektýrasy qalyptasady. Osyǵan qaramastan bıyl salyqtyq jáne kedendik aqparattyq júıelerdi ıntegratsııalaýdy aıaqtaımyz. 14 júıeniń ornyna tek 5 júıe jumys isteıdi. Osylaısha túbegeıli jańa, birtutas tsıfrlyq júıeni ázirleýdemiz», - dedi M.Tákıev Úkimettiń búgingi otyrysynda.
Mınıstrdiń aıtýynsha, bul bıznesti barlyq jumys kezeńderinde qoldaýdyń servıstik úlgisine aınalady jáne kásipkerlerge túsetin ákimshilik júktemeni aıtarlyqtaı azaıtady.
«Bıyl elektrondy shot-faktýra jáne Táýekelderdi basqarý júıeleriniń fýnktsıonalyn keńeıtý jumystaryn aıaqtaý josparlanǵan. Ol jasandy ıntellekt elementteri negizinde taldamalyq esepteýler júrgizýge jáne salyqtyq buzýshylyqtar men táýekel aımaqtaryn belsendi túrde anyqtaýǵa múmkindik beredi. «ASTANA-1» jáne «Bir tereze» aqparattyq júıeleriniń qoldanystaǵy fýnktsıonaly jańadan qurylǵan «KEDEN» aqparattyq júıesine beriledi. Osy júıe aıasynda basqa da paıdaly jańa qyzmetter men modýlder ázirlenedi», - dedi Mádı Tákıev.
Sonymen birge, jalpy Qarjy mınıstrligi boıynsha kóptegen máseleni sheshetin jańa tsıfrlyq platforma qurý jumystary bastaldy. Bul bıýdjetti josparlaýdan bastap, ıgerýge deıingi aldyn ala baqylaýǵa, otandyq óndirýshiler týraly tolyq taldaý jasaýǵa múmkindik beredi.
Buǵan deıin Qarjy mınıstri elimizde salyqtyq tekserýler azaısa da, salyqtyq óndirip alý eki esege ulǵaıǵanyn aıtqan edi.
