Salyqtyq aýdıt endi elektrondy formatta ótedi
ASTANA. KAZINFORM – Qarjy mınıstrligi Memlekettik kirister komıtetiniń Salyqtyq aýdıt basqarmasynyń bas sarapshysy Nurlan Qojageldıevtiń qatysýymen «Salyqtyq tekserýler barysynda standartty tekserý faılyn qoldaný» taqyrybynda tikeleı efır ótti.
Spıkerdiń aıtýynsha, 2026 jyldyń 1 qańtarynan bastap jańa salyq kodeksindegi birqatar ózgertý kúshine enedi. Solardyń biri salyqtyq tekserýlerge arnalǵan standartty tekserý faılynyń engizilýi. Bul talap Salyq kodeksiniń 161-babynda kózdelgen jáne osy norma aıasynda jeti standart boıynsha ákimshilik-quqyqtyq akt qabyldanǵan.
Nurlan Qojageldıevtiń túsindirýinshe, standartty tekserý faıly bul býhgalterlik derekterdi elektrondyq formatta usynýǵa múmkindik beretin qural.
– Qarapaıym tilmen aıtqanda, bul – XML nemese Excel formatyndaǵy elektrondyq faıl, onda tek býhgalterlik málimetter, ıaǵnı kirister, shyǵystar, salyqtar jáne aktıvter týraly aqparat jınaqtalady. Mundaı faıl býhgalterlik esep júrgizýge arnalǵan aqparattyq júıeden 1C, SAP, nemese Oracle eksporttalyp, keıin salyqtyq taldaý júıesine júkteledi. Júıe óz kezeginde derekterdi avtomatty túrde oqyp, sáıkessizdikter men qatelikterdi anyqtaıdy, – dedi ol.
Sonymen qatar ol óz sózinde standartty tekserý faıly jeti baǵyt boıynsha qalyptastyrylatynyn atap ótti.
– Atap aıtqanda, standartty faıl kelesi baǵyttar boıynsha qalyptastyrylady: salyqtar men bıýdjetke tólemderdiń esebi jáne tólenýi; negizgi quraldar men amortızatsııanyń esepke alynýy; QQS boıynsha operatsııalar esebi; rezıdent emestermen ózara esep aıyrysýlar; 100 jáne 300 nysandary arasyndaǵy kiris derekterin salystyrý; býhgalterlik eseptegi shyǵyndardy sáıkestendirý; sondaı-aq taýarlar men qyzmetter boıynsha shyǵyndar esebi – mysaly, jarnama, marketıng, ınjenerlik jáne basqa da qyzmet túrleri, – dep túsindirdi maman.
Sonymen qatar jańa faılda buryn bolmaǵan mańyzdy derekter de qamtylady. Máselen, elektrondy shot-faktýralar, býhgalterlik eseptegi shyǵyn baptary jáne olardyń deklaratsııadaǵy naqty joldarmen sáıkestigi.
– Bul jańashyldyq salyq tóleýshiler men salyq organdary arasyndaǵy ózara áreketti jeńildetedi. Qujattardy qaǵaz túrinde suratý azaıady, adamı faktordyń áseri tómendeıdi. Salyq tóleýshi óz derekterin aldyn ala tekserip, sáıkestigin baǵalaı alady. 1S júıesinde mundaı fýnktsııalar keńeıtiledi, – dep atap ótti sarapshy.
Nurlan Qojageldıevtiń aıtýynsha, standartty tekserý faıly 2026 jylǵy 1 qańtardan bastap jańa Salyq kodeksimen qatar qoldanysqa engiziledi. Qazirgi tańda tıisti normatıvtik-quqyqtyq akt resmı túrde bekitilip, ýákiletti organda tirkelgen.
Buǵan deıin 2026 jyldan bastap salyq tólemegen sheteldik platformalar buǵattalýy múmkin ekenin jazǵanbyz.