«Salıqaly urpaq» qory muqtaj jandarǵa úı syılady

ALMATY. QazAqparat - Qazaqstan Respýblıkasy Táýelsizdiginiń 30 jyldyǵy, sondaı-aq «Salıqaly urpaq» qoǵamdyq qory óziniń 5 jyldyq mereı toıyn atap ótý aıasynda 10 muqtaj otbasyna úı men páterler syılady. Bolat Nazarbaev quryltaıshysy bolyp tabylatyn qordyń atynan kiltti tabystaýǵa «Salıqaly urpaq» qor dırektory Qasym Qasabekov, «Asar-ume» qorynyń prezıdenti Ashat Nýrmashev, Qarasaı aýdanynyń ákimi Dalabaev Jandarbek, qoǵam qaıratkeri Babaev Shaverdı jáne taǵy da basqa tanymal blogerler qatysty.

«Bizdiń «Salıqaly urpaq» qoǵamdyq qoryna 5 jyl bolyp otyr. Osydan bir 5 jyl buryn Bolat Ábishuly Nazarbaev aǵamyz osy qordy qurǵan edi. Nıeti bizdiń ata-babamyz salyp ketken dara jol - qaıyrymdylyq sharasynda elimizge áleýmettik, saıası, dinı, rýhanı salada qyzmet etý. Sodan beri talaı is-sharalar júrgizildi, áli de talaı is-sharalar júrgiziledi», - dedi «Salıqaly urpaq» qorynyń dırektory Qasym Qasabekov.

Baspanaly bolý baqyty buıyrǵandar arasynda kópbalaly jáne muqtaj otbasylar, múgedek balalardy tárbıelep otyrǵan otbasylar bar. Qordan páter alǵan kóp balaly ana Armangúl Kerimbaeva óz baspanasyn kópten beri armandaǵanyn aıtty.

«Meni osy habardy estigennen beri ózim bir sondaı tolǵanysta boldym. Osyndaı jomart jandarymyz kóp bolsyn. Bolat Nazarbaev aǵamyzdyń densaýlyǵy zor bolsyn, eki dúnıeniń baqytyn násip etsin ol kisige. Biz sııaqty shynaıy muqtaj adamdarǵa baspana berip otyrǵan kópshilik jomart jandar, sizderge Alla razy bolsyn. Ózim shynymdy aıtsam tolqyp turmyn, joldasym ómirden ótkenine alty jyl bolyp edi, myna qyzdarmen 6-7 jyl boldy kvartırada turyp jatqanymyzǵa»,- deıdi ol.

Sonymen qatar, B.Nazarbaev qorynan 4 qaıyrymdylyq uıymy avtokólik, shaǵyn avtobýstar alyp, túrli nomınatsııalar boıynsha músinshelermen marapattaldy. Olardyń arasynda «Syǵanaq» paralımpıadalyq sadaqshylar qoǵamdyq birlestigi, BTsP bar balalarǵa kómek kórsetetin «Arman Almaty» qory, «DAUA Charity» jáne «Qamqorlyq» qaıyrymdylyq qory bar. Uıymdastyrýshylar múgedektigi bar adamdardyń, BTsP bar balalardyń jáne t. b. qajettilikterin eskere otyryp, jaıly kólik quraldaryn tańdady.

Saltanatty rásimde kontserttik baǵdarlamalar boldy, onyń aıasynda «Úshqońyr» folklorlyq-etnografııalyq ansambli, «Alataý serileri» toby, «Sát» tobynyń solısi jáne «Salıqaly urpaq» qory janynda jumys isteıtin «Bereke úıi» tárbıelenýshileri óner kórsetti.

Aıta keteıik, «Salıqaly urpaq» qoǵamdyq qory 2016 jyly metsenat Bolat Nazarbaevtyń bastamasymen qurylǵan. Qor jumysy az qamtylǵan otbasylardy, múgedekter men jetimderdi qoldaýǵa baǵyttalǵan. Qor qarjylyq qoldaý, azyq-túlikpen, medıtsınalyq quraldarmen jáne t.b. kómek kórsetý boıynsha birqatar jobalardy iske asyrýda.