«Salıqaly urpaq» qory Maqtaaral aýdanynda 20 úıdiń qurylysyn bastady
MAQTAARAL. QazAqparat- Maqtaaral aýdanynda «Salıqaly urpaq» qory 20 úıdiń qurylysyn bastap ketti. Jańa baspana sý tasqynynan zardap shekken turǵyndarǵa arnalǵan Myrzakenttegi jańa shaǵynaýdannan boı kóteredi, dep habarlaıdy QazAqparat tilshisi.
Búginde qurylys alańynda daıyndyq jumystary júrip jatyr. Jaqyn kúnderi jańa baspana irgetasy qalanyp, úıdiń qabyrǵasy kóteriledi dep josparlanǵan. «Salıqaly urpaq» qorynyń resmı ókili Nurlan Baıymbetovtyń aıtýynsha, turǵyn úı qurylysy shilde aıynda tolyq aıaqtalyp, turǵyndarǵa kilti tabystalady.
«Myrzakenttegi bizdiń qor atynan salynyp jatqan úılerdi jergilikti «Nur el» jáne «Tineı-qurylys» kompanııalary júrgizýde. Qazirgi tańda jerdi qazý, qurylysqa daıyndyq jumystary júrip jatyr. Aldaǵy kúnderi irgetasyn qalap, 20 úıdiń qurylysyn 20 shilde kúni tolyq aıaqtaýdy josparlap otyrmyz», - dedi Nurlan Baıymbetov.
Aıta keteıik, buǵan deıin atalǵan qor atynan tasqynnan zardap shekkenderge kómek retinde 20 tonna azyq-túlik jetkizilgen bolatyn. Sondaı-aq, «Salıqaly urpaq» qory sýdan zardap shekken jaǵdaıy tómen 100 otbasyǵa 100 myń teńgeden úlestirmek.
Balalarǵa da bazarlyq retinde kópbalaly jáne az qamtylǵan otbasydan shyqqan 20 oqýshyny Almaty oblysyndaǵy jazǵy lagerlerge jóneltedi.
