Salyq júıesindegi tsıfrlyq jańalyqtar — deklaratsııa tapsyrý jeńildeıdi

ASTANA. KAZINFORM — Qazaqstanda salyq deklaratsııasyn avtomatty túrde tapsyrý múmkindigi iske qosyldy. Endi salyq tóleýshiler aldyn ala toltyrylǵan deklaratsııany ala alady. 

Ony tekserip, qajet bolsa túzetip, birneshe mınýtta tapsyrýǵa bolady.

Bul jańalyq ásirese QQS boıynsha esep beretin kásipkerler úshin ýaqytty únemdeýge jáne ákimshilik júktemeni azaıtýǵa múmkindik beredi. Bul týraly Qarjy vıtse-mınıstri Erjan Birjanov málimdedi.

Salyq eseptiligin tsıfrlandyrý aıasynda deklaratsııalardy aldyn ala toltyrý júıesi kezeń-kezeńimen engizilip jatyr.

Vıtse-mınıstrdiń aıtýynsha, reformanyń negizgi maqsaty — salyq tóleýshilerge túsetin ákimshilik júktemeni azaıtyp, esepti tapsyrý protsesin barynsha jeńildetý.

— Bizdiń negizgi maqsatymyz — deklaratsııa tapsyrý protsesin múmkindiginshe avtomattandyrý. Sebebi salyq salýǵa qajetti derekterdiń basym bóligi qazirdiń ózinde memlekettik aqparattyq júıelerde bar, — dedi Erjan Birjanov.

Aldyn ala toltyrylǵan deklaratsııa servısi 20 qańtardan beri jumys istep tur. Qysqa ýaqyt ishinde ony 2 myńǵa jýyq salyq tóleýshi paıdalanyp úlgeripti. Júıe avtomatty túrde salyq salynbaıtyn aınalym, jalpy aınalym jáne basqa da negizgi kórsetkishterdi kórsetedi, al salyq tóleýshi óz qajetine qaraı málimetterdi túzete alady.

Oǵan qosa júıege jasandy ıntellekt negizindegi assıstent qosylady. Bul qural salyq tóleýshiniń profılin, esepti kezeńin jáne qoldanylatyn rejımin eskere otyryp, deklaratsııany qalaı toltyrý kerektigin usynady.

— QQS tóleýshilerdiń barlyǵy birdeı emes. Bireýi bólek esep júrgizedi, bireýi proportsıonaldy esep qoldanady. Osyndaı jaǵdaıda JI-assıstent salyq tóleýshiniń esebin durys jáne yńǵaıly túrde toltyrýǵa baǵyt beredi. Qazirgi ýaqytta ol synaq rejıminde jumys istep tur. Bıyl birinshi toqsannyń eseptik kezeńinde tolyq qoldanysqa engiziledi, — dep atap ótti vıtse-mınıstr.

Sonymen qatar, ózin-ózi jumyspen qamtyǵandardy tirkeý rásimi de jeńildetilgen. Azamat e-Salyq Business arqyly qyzmet túrin kórsetip, tabysyn engizip, elektrondyq chek jasaıdy, sol arqyly ózin-ózi jumyspen qamtyǵan retinde avtomatty túrde tirkeledi. Bul jańa júıe halyq arasynda keń qoldanylyp jatyr. Búginge deıin 130 myńnan astam azamat óz qyzmetin zańdastyrǵan.

— Bizdiń maqsat — salyq tóleýshi men memleket arasyndaǵy ózara is-qımyldy barynsha qarapaıym ári yńǵaıly etý. Tsıfrlandyrý — osy reformanyń negizgi tiregi, — dep qorytyndylady Erjan Birjanov.

Aıta keteıik, Úkimette salyq reformasyn engizý barysy jáne bıznesti qoldaý sharalary talqylandy.