Salyq júıesindegi 14 aqparattyq platforma 5 negizgi júıege biriktirildi
ASTANA. KAZINFORM – Memlekettik kirister komıtetiniń aqparattyq júıeleri 14-ten 5 negizgi platformaǵa deıin yqshamdaldy. Bul týraly Qarjy vıtse-mınıstri Áset Turysov Ortalyq kommýnıkatsııalar qyzmetinde ótken baspasóz máslıhatynda aıtty.
Onyń sózinshe, jańartylǵan tsıfrlyq arhıtektýra bes negizgi júıeden turady. Olar – Salyqtyq ákimshilendirýdiń aqparattyq júıesi, elektrondyq shot-faktýralar júıesi, Smart Data Finance, táýekelderdi basqarý júıesi jáne «Keden» júıesi.
- Salyqtyq ákimshilendirýdiń ıntegratsııalanǵan aqparattyq júıesi buryn qoldanysta bolǵan jeti júıeni biriktirdi. Bul salyq tóleýshilermen jumystyń tıimdiligin arttyrdy. Qazir júıe arqyly memlekettik organdarmen jáne banktermen 75 ıntegratsııa iske qosyldy. Sonyń nátıjesinde jańa salyq tóleýshi kabınetinde býhgalterler, ekonomıster men zańdy tulǵalar jumys istep otyr, – dedi vıtse-mınıstr.
Onyń aıtýynsha, Smart Data Finance Qarjy mınıstrliginiń negizgi tsıfrlyq platformalarynyń birine aınaldy. Júıe burynǵy eki platformanyń ornyna engizilip, memlekettik organdardyń 74 derekkózinen jınalatyn aýqymdy derekter negizinde árbir salyq tóleýshige qatysty tsıfrlyq dose qalyptastyrýǵa múmkindik beredi.
- Bul derekter salyq eseptiligin toltyrý kezinde qajetti aqparatty avtomatty túrde usynýǵa múmkindik beredi. Qazir málimetter biryńǵaı derekter qoımasyna jınaqtalyp jatyr, – dedi Áset Turysov.
Mınıstrlik aldaǵy ýaqytta proaktıvti deklaratsııalaý modeline kóshýdi josparlap otyr. Sonymen qatar azamattar men bızneske ómirlik tsıkldiń barlyq kezeńinde qyzmet kórsetetin servıstik tásil engiziledi.
Aıta keteıik, buǵan deıin qarjy mınıstrligi byltyr salyq boıynsha jospar nege oryndalmaǵanyn túsindirgen edi.
