Salyq júıesi jeti platformany biriktirdi – Qarjy mınıstrligi
ASTANA. KAZINFORM – Qazaqstanda salyqtyq ákimshilendirýdi tsıfrlandyrý aıasynda Integratsııalanǵan salyqtyq ákimshilendirý júıesi (ISNA) iske qosyldy. Bul týraly Qarjy vıtse-mınıstri Áset Turysov málimdedi.
Onyń aıtýynsha, jańa júıe buryn bólek jumys istegen jeti aqparattyq platformany biriktirip, eskirgen tehnologııalyq sheshimderdi almastyrdy.
– Qazirgi ýaqytta ISNA tolyq iske qosylyp, turaqty jumys istep tur, – dedi vıtse-mınıstr.
Júıeni engizý memlekettik qyzmetterdi kórsetý jáne óńdeý ýaqytyn aıtarlyqtaı qysqartty. Atap aıtqanda, operatsııalyq kúndi jabý merzimi 18 saǵattan 3 saǵatqa deıin, onlaın tólemderdi óńdeý ýaqyty 15 mınýttan 1 mınýtqa deıin, al qujat aınalymy 1 saǵattan 1 mınýtqa deıin qysqardy.
Sonymen qatar júıe salyq tóleýshilerdiń shottaryndaǵy buǵattardy onlaın rejımde alyp tastaýǵa múmkindik berdi.
ISNA quramynda «Reabılıtatsııa jáne bankrottyq» modýli iske qosyldy. Onyń arqasynda prokýratýra, bank jáne sot organdary arasyndaǵy protsester tolyq tsıfrlandyrylyp, qujattardy qaraý merzimi 10 kúnnen 1 kúnge deıin qysqardy.
Vıtse-mınıstrdiń sózinshe, jańa Salyq kodeksi aıasynda júıeni odan ári damytý jáne jetildirý jumystary jalǵasyp jatyr.
Aıta keteıik, buǵan deıin salyq júıesindegi 14 aqparattyq platforma 5 negizgi júıege biriktirilgeni jaıly habarladyq.
