Salyq júıesi bıznes ókilderimen senimdi seriktestik ornatý tásiline kóshýi kerek - Toqaev

TARAZ.KAZINFORM - Jambyl oblysynyń turǵyndarymen kezdesýi barysynda Prezıdent Qasym-Jomart Toqaev bıznesi myqty memlekettiń halqy – baqýatty, qoǵamy turaqty bolatynyn aıta kele, elde kásipkerlerge barynsha jaǵdaı jasalyp otyrǵanyn atap ótti.

Birinshi qańtardan bastap jańa Salyq kodeksi kúshine enedi. Salyq júıesi baqylaý-jazalaý tásilinen bıznes ókilderimen senimdi seriktestik ornatý tásiline kóshýi kerek. Bul – Úkimettiń aldynda turǵan mindet. 

Oblystardaǵy iskerlik ahýaldy jaqsartý úshin «Іsker aımaq» baǵdarlamasy júzege asyrylady. Bul joba, eń aldymen, aýyldar men shaǵyn qalalarda kásipkerlikti damytýǵa arnalǵan. 

-Bıznesi myqty memlekettiń halqy – baqýatty, qoǵamy turaqty bolady. Búginde shaǵyn jáne orta bıznestiń ekonomıkadaǵy úlesi 40 paıyzǵa jaqyndady. Kásipkerler 4,5 mıllıonǵa jýyq adamdy jumyspen qamtyp otyr. Bul – elimizdegi eńbekke jaramdy azamattardyń jartysyna jýyǵy degen sóz,-dedi Memleket bashysy. 

Sonymen qatar Qasym-Jomart Toqaev óndiris salasy tyń serpinge ıe bolǵanyna toqtaldy.

-Elimizde belgili sheteldik jáne otandyq kompanııalar oıdaǵydaı jumys istep jatyr, iri óndiris oryndary ashylyp jatyr. Bıyldyń ózinde 33 zaýyt iske qosyldy,-dedi ol. 

Aıta keteıik, Memleket basshysy Jambyl oblysynda jumys saparymen júr. Prezıdent onda birqatar ónerkásiptik jáne áleýmettik nysandardy aralap kórdi.