Salyq zańnamasyna ózgerister Quryltaı qaraýyna qashan engiziledi
ASTANA. KAZINFORM — Osy jyldyń sońyna deıin Quryltaıǵa «Kapıtal naryǵy týraly» zań jobasy engiziledi. Bul týraly Úkimet otyrysynda Prezıdent Joldaýyn iske asyrýdy talqylaý barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Makroekonomıkalyq saıasat salasynda memlekettik bıýdjetti konservatıvti jáne shynaıy makroekonomıkalyq boljamdar negizinde qalyptastyrýǵa erekshe nazar aýdarylatyn bolady. Zańnamalyq qamtamasyz etý bóliginde osy jyldyń sońyna deıin Quryltaıǵa «Kapıtal naryǵy týraly» Zań jobasy, sondaı-aq bıznestiń usynystaryn eskere otyryp, qalyptastyrylǵan salyq zańnamasyna naqty ózgerister engiziledi, — dedi Serik Jumanǵarın.
Onyń aıtýynsha, 2027 jyly Qazaqstan qor bırjasy (KASE), Astana halyqaralyq qarjy ortalyǵy jáne Alatau City arasyndaǵy seriktestikti nyǵaıta otyryp, Qarjy naryǵyn damytýdyń biryńǵaı strategııasy týraly Jarlyq bekitiledi.
— Qarjy júıesin keshendi jańǵyrtýdyń qorytyndy kezeńi memlekettik qazynashylyq júıesin tolyq tsıfrlandyrý bolady, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
