Salyq tóleýshini tirkeý jeńildep, eseptilik qysqarady: Jańa Salyq kodeksiniń jobasy
ALMATY. KAZINFORM - Almatyda Qazaqstan Respýblıkasy Parlament Májilisiniń janyndaǵy Qoǵamdyq palatanyń kóshpeli otyrysynda Ulttyq ekonomıka vıtse-mınıstri Azamat Ámrın jańa Salyq kodeksi jobasyndaǵy jańalyqtardy aıtty.
QR Ulttyq ekonomıka mınıstrligi baspasóz qyzmetiniń habarlaýynsha, Azamat Ámrın óz sózinde jańa Salyq kodeksinde ákimshilendirýdiń servıstik modeli engiziletinin atap ótti. Salyq tóleýshini tirkeý jeńildetiledi. Salyq eseptiligi qysqartylady. Baqylaý tsıfrlandyrylady.
Onyń aıtýynsha, óndiriske paıdany qaıta ınvestıtsııalaý úshin keshendi tásilder ázirlengen. Arnaıy salyq rejımderi ońtaılandyrylyp, bıznesti bólshekteý táýekelderin azaıtý sharalary qabyldandy.
Korporatıvtik tabys salyǵynyń saralanǵan mólsherlemesin engizý usynylýda. Bul rette 20%-dyq bazalyq mólsherleme saqtalady. Bank sektory men oıyn bıznesinde mólsherlemeni 25% deńgeıinde, óńdeý ónerkásibi, qarjy lızıngi jáne áleýmettik salada 10%-ǵa deıin tómendetý, sondaı-aq aýyl sharýashylyǵy taýaryn óndirýshiler úshin 3% deńgeıinde saqtaý usynylady.
Investıtsııalardy yntalandyrý úshin ǵımarattardy, qurylystardy, mashınalardy, jabdyqtardy, baǵdarlamalyq qamtamasyz etýdi onyń fýnktsıonaldyq maqsatyna baılanystyrmaı satyp alýǵa/salýǵa arnalǵan shyǵyndardy birjolǵy 100% shegerý túrinde salyqtyq jeńildikter kózdeledi.
Sondaı-aq, BJZQ-daǵy azamattardyń zeınetaqy tólemderin jeke tabys salyǵynan bosatý josparlanýda.
«Sán-saltanat» zattaryna salyq salýǵa kelsek, qymbat múlikke joǵary salyq stavkalary, qymbat jeńil avtomobılderge, alkogol men temeki ónimderine, sondaı-aq teńiz kemeleri men ushý apparattaryna qosymsha aktsızder usynylady. Barlyq jeke tulǵalar úshin kólik salyǵynyń stavkalaryn tómendetý usynylady: eger mashınanyń qyzmet etý merzimi 10 jyldan assa, onda stavka 30%-ǵa, al 20 jyldan assa 50%-ǵa tómendetiledi», - dep atap ótti vıtse-mınıstr.
Budan bólek, qujatta tıimsiz paıdalanylǵan jerlerge jer salyǵyn bazalyq mólsherlemeden 40 ese mólsherde qosymsha engizý kózdeledi.
Jańa Salyq kodeksiniń jobasy qazirgi ýaqytta Parlament Májilisiniń jumys toptarynda qaralýda.
