Salyq tóleýshi kabınetinde eńbekaqy qoryna arnalǵan jańa servıs paıda bolady
ASTANA. KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńsesiniń 17-shi otyrysynda Memlekettik kirister komıtetiniń Salyq tóleýshi kabınetindegi jańa servıstiń jobasy tanystyryldy. Bul týraly Úkimettiń baspasóz qyzmeti málim etti.
Ol eńbekaqy tóleý qorynan esep aıyrysý men mindetti tólemdi jumys berýshiniń bir ret qolmen basý arqyly oryndaýyna múmkindik beredi.
Eńbekaqy tóleý qorynan salyqtar men áleýmettik tólem tetigin jeńildetý máselesin kásipkerler men býhgalterlik qaýymdastyq birneshe ret kóterip, ol buryn Jobalyq keńse alańynda qarastyrylǵan bolatyn.
— Búgingi tańda jumys berýshiler jumysshylarǵa arnap, shamamen 7-8 túrli áleýmettik tólemdi júzege asyrady. Olardyń árqaısysy jeke ádistememen esepteledi. Jańa servıs qoldanystaǵy jeńildikter men qyzmetkerlerdiń jekelegen sanatynyń ereksheligin eskere otyryp, barlyq qajetti tólemdi avtomatty túrde esepteýge, sondaı-aq tólem qujatyn bankke jiberýge múmkindik beredi, — delingen habarlamada.
Memlekettik aqparattyq júıelerge ıntegratsııanyń arqasynda servıs qyzmetkerlerdiń mártebesine saı tıisti esepteý rejımin qoldana alady. Sondaı-aq, jumys ýaqytynyń tabelin júrgizý múmkindigi qarastyrylǵan, sonyń negizinde qajetti esepteýler avtomatty túrde oryndalady.
Servısti engizý shaǵyn jáne orta bıznes sýbektileriniń ákimshilik júktemesin aıtarlyqtaı tómendetedi, máselen, 200.00 nysanyn usyný qajettiliginen bas tartýǵa bolady.
Memlekettik kirister komıtetiniń tóraǵasy Jandos Dúısembıev atap ótkendeı, servısti engizý tolyǵymen erikti túrde júrgiziledi. Birinshi kezeńde servısti shaǵyn jáne orta bıznes sýbektileri paıdalansa, keıinnen býhgalterlik júıemen ıntegratsııalanyp, iri kásiporyndarǵa da taratylady.
— Servıs áleýmettik tólem boıynsha esep aıyrysýdy avtomattandyrýǵa, qujatty toltyrý kezinde qateni azaıtýǵa jáne jumys berýshi men qyzmetkerdiń arasyndaǵy esep aıyrysýdyń ashyqtyǵyn arttyrýǵa múmkindik beredi, — dep habarlady Úkimetten.
Bul qyzmet osy jyly qyrkúıekte pılottyq joba retinde iske qosylady. Synaqtan sátti ótken jaǵdaıda, 2027 jylǵy qańtardan bastap turaqty engiziledi.
Sondaı-aq otyrysta Ipotekalyq turǵyn úı qaryzyn qaıta qarjylandyrý baǵdarlamasy sheńberinde jeke tulǵanyń kredıt (qaryz) boıynsha mindettemesi toqtatylǵan jaǵdaıda jeke tabys salyǵy salynbaıtyn kirister tizbesin keńeıtý máselesi qaraldy.
Úkimettiń málimetinshe, memlekettik organdar tolyqtyrýlar engizý qajettiligi turǵysynan, onyń ishinde otbasynyń áleýmettik kartasy boıynsha bazalyq tásildi, sondaı-aq kredıtter (qaryzdar) berý kezinde alaıaqtyq shemalar saldarynan zardap shekken jeke tulǵalardyń bolýyn eskere otyryp, qoldanystaǵy erekshelikterge oraı, kiristerge salyq salýdy birlesip qaraıdy.
Budan basqa, otyrysqa qatysýshylar salyq organdarynyń sheteldik azamattarǵa Qazaqstan Respýblıkasynyń rezıdenti degen sertıfıkat berýin qaıtadan bastaý týraly usynysty qoldady. Buryn qoldanysta bolǵan tetikke qaıta oralý qajettiligi sheteldik klıentterdiń salyq mártebesin aıqyndaý jáne bank salymy boıynsha tıisti salyq salý rejımin qoldaný kezinde ekinshi deńgeıli bankterde týyndaıtyn máselelerge baılanysty bolyp otyr.
Otyrysqa qatysýshylar ekinshi deńgeıli bankterdiń usynysyn qoldady.
Eske sala keteıik, Serik Jumanǵarın Quryltaıdyń jańa quramy Salyq kodeksine 50 shaqty túzetý engizetinin aıtty.
