Salyq tóleýden jaltarǵan: Astanada jalǵan qarjylyq qujat jasaǵan on adamǵa úkim shyqty

ASTANA. KAZINFORM — Sot úkimimen 10 tulǵa túrli kompanııalarǵa jalǵan qarjylyq qujat jasap berip, memleket bıýdjetine 1,6 mıllıard teńge kóleminde salyq tólemeýge jol ashyp bergen. Bul týraly Astana qalasynyń prokýratýrasy málim etti.

Salyq salý salasyndaǵy qylmystyq quqyq buzýshylyqtar memleketke eleýli materıaldyq zalal keltiredi. Jalǵan shot-faktýra jasaý arqyly qolma-qol aqsha kompanııalaryn qurǵan tulǵalardyń qylmystyq áreketi nátıjesinde olardyń kontragentteri memleket bıýdjetine salyq tólemeı sytylyp ketedi. 

— Sot úkimimen 10 tulǵa túrli kompanııalarǵa jalǵan qarjylyq qujattar berip, memleket bıýdjetine 1,6 mıllıard teńge kóleminde salyq tóleýden jaltarýǵa múmkindik bergen uıymdasqan qylmystyq top qurǵany úshin ártúrli merzimge bas bostandyǵynan aıyryldy, — delingen habarlamada.

Atalǵan salyq somasyn tóleýden jaltarǵan kontragentter bankrot dep tanylǵanyn eskere otyryp, elorda prokýratýrasy azamattyq sotqa kináli tulǵalardan atalǵan zalaldy óndirý týraly talap aryzben júgindi.

Sot sheshimimen Astana qalasy prokýrorynyń talap aryzy qanaǵattandyrylyp, sottalǵandardan memleket kirisine 1,6 mlrd teńge kóleminde zalal óndirildi. Sot aktisi zańdy kúshine endi.