Salyq tóleýden jaltardy dep kúdikke ilingen bloger 5 jylǵa sottaldy

ASTANA. KAZINFORM — Máskeýdiń Savelovskıı aýdandyq soty reseılik bloger Elena Blınovskaıany asa iri kólemde salyq tóleýden jaltardy jáne aqsha jylystatý isi boıynsha bes jylǵa bas bostandyǵynan aıyrdy, dep habarlaıdy TASS.

— Qylmys jıyntyǵy boıynsha sońǵy úkim 5 jyl bas bostandyǵynan aıyrý jazasy kesildi, jaza jalpy rejımdegi túzeý kolonııasynda óteledi, — dedi sýdıa.

Salyq tóleýden jaltarǵan degen aıypqa kelsek, bloger salyq merziminiń ótýine baılanysty qylmystyq jaýapkershilikten bosatyldy.

— Blınovskaıa Reseı Federatsııasynyń Qylmystyq kodeksiniń 198-baby boıynsha 2 bóligi boıynsha taǵylǵan aıypqa baılanysty qylmystyq jaýapkershilikten bosatyldy, — dep qosty sýdıa.

Sózjarys barysynda memlekettik aıyptaýshy sottan Blınovskaıany alty jylǵa bas bostandyǵynan aıyrýdy surady. Sondaı-aq memlekettik aıyptaýshy blogerge qosymsha jaza retinde 1,5 mıllıon rýbl kóleminde aıyppul salýdy surap, oǵan qarsy azamattyq talapty tolyq qoldap, bes jylǵa kommertsııalyq qyzmetpen aınalysýǵa tyıym salýdy surady.

Sotta jaýap alý kezinde ol óziniń qylmystyq isi boıynsha salyq beresheginiń somasyn jáne aqsha jylystatý isine qatysy baryn tolyq moıyndady. Onyń aıtýynsha, salyq máselesimen aldymen onyń kúıeýiniń tanystary, sodan keıin onyń dosy Lılııa Orlenko aınalysqan.

Eske salsaq, blogerdiń soty 2024 jyldyń tamyz aıynyń sońynda bastaldy. Buǵan deıin qylmystyq isti qaraý barysynda Orlenkodan, sondaı-aq blogerdiń trenıngteriniń kýratorlarynan jáne sottalýshynyń qyzmetine qatysy bar kompanııalardyń bas dırektorlarynan jaýap alynǵan. Tergeýshilerdiń málimetinshe, Blınovskaıa 2019-2021 jyldary bıznesti bólshekteý shemalary arqyly 900 mıllıon rýblden astam salyq tóleýden jaltarǵan. 2023 jyldyń sáýir aıynda ol Reseıden ketkeli turǵan jerinen ustaldy.

Osyǵan deıin habarlanǵandaı, Qazaqstanda 12 bloger 1,4 mlrd teńge kóleminde qosymsha tabystaryn deklaratsııalady.