Salyq tóleý, ony tólemeýden arzan bolýy kerek — Aıdos Sarym
ALMATY. KAZINFORM — Almatyda QR Parlamenti Májilisi janyndaǵy Qoǵamdyq palatanyń kóshpeli otyrysy ótti. Іs-sharaǵa Májilis jáne máslıhat depýtattary, kásipkerler men sarapshylar qatysty.
Otyrys barysynda jańa zań jobasynyń qoldanystaǵy zańnamadan aıyrmashylyǵy men onyń basty maqsaty aıtyldy.
— Salyq kodeksi — elimizdiń ekonomıkalyq damýy úshin eń mańyzdy zań deý artyq aıtqanymyz bolmas. Búgin talqylanatyn taqyryptyń birneshe basty máselesine toqtalyp ótsek. Birinshi, salyq kodeksiniń turaqtylyǵy. Qazirgi kezge deıin qansha kodeks qabyldanyp, qanshama ózgeris engizildi. Bıznes jumys isteýdiń ornyna, tez ózgeretin zańǵa beıimdelýmen júredi. Sondyqtan bizdiń maqsatymyz qaıta-qaıta ózgeris engizilmeıtin turaqty zań qabyldaý. Ekinshi, salyq bazasyn keńeıtý. Qazirgi ýaqytta elimizde 2 mıllıonǵa jýyq shaǵyn jáne orta bıznes sýbektileri bar. Jańa salyq kásipkerlerdi ashyq jumys isteýge jáne salyq tóleýge ıtermeleýi qajet. Zańdaǵy basty oı — salyq tóleý, ony tólemeýden arzan bolýy kerek, — dedi Májilis depýtaty Aıdos Sarym.
Al jańa salyq kodeksi boıynsha jumys tobynyń jetekshisi — Májilis depýtaty Berik Beısenǵalıev zań jobasyn talqylaý boıynsha búginge deıin 12 otyrys ótkenin atap ótti.
— Zań jobasynyń negizgi baǵyttary Májiliste 17 qyrkúıek kúni tanystyryldy. Jańa jobanyń qazirgi qoldanystaǵy zańnan basty aıyrmashylyǵy — salyqtyq ákimshilendirýge basa nazar aýdarý. Zań jobasyn qarastyrý úshin Májiliste jumys toby quryldy, onyń quramyna depýtattar, memlekettik organdardyń ókili, «Atameken» UKP jáne qoǵamdyq birlestik ókilderi, sarapshylar kirdi. Jumys tobynyń otyrystaryna kem degende 150, orta eseppen 230 adam qatysady. Búginge deıin jumys tobynyń 12 otyrysy ótti, — dedi Berik Beısenǵalıev.
Eske salaıyq, Prezıdent jańa Salyq kodeksin qabyldaý merzimin kelesi jylǵa aýystyrýǵa bolatynyn aıtty.
Buǵan deıin jańa salyq kodeksinde tólemder sany 77-ge azaıyp, 6 alym túri qysqartylmaq ekenin jazǵanbyz.
Sondaı-aq, jańa salyq kodeksinde josparly salyqtyq tekserýler alynyp tastalmaq.
Oǵan qosa, jańa zań jobasy boıynsha eski kólik salyǵy 50%-ǵa tómendeıdi.