Salyq saıasatynyń ekonomıkalyq ósimge yqpalyn eskerý qajet – Qarjy vıtse-mınıstri

ASTANA. KAZINFORM - Qarjy vıtse-mınıstri Erjan Birjanov Shyǵys Qazaqstan oblysynda kásipkerlermen kezdesip, salyq reformasyndaǵy ózgeristerdi túsindirdi, dep habarlaıdy Úkimettiń baspasóz qyzmeti.

 Úkimet qosylǵan qun salyǵynyń (QQS) mólsherlemesin ár salaǵa saı saralanǵan túrde ósirýdi usynyp otyr. Jalpy mólsherleme – 16%, aralyq mólsherleme – 10%, al aýyl sharýashylyǵy taýaryn óndirýshiler úshin 0% mólsherinde bosatý qarastyrylǵan.

Vıtse-mınıstrdiń aıtýynsha, QQS boıynsha esepke qoıý shegin 80 mln teńgeden 15 mln teńgege deıin tómendetý, sondaı-aq arnaıy salyqtyq rejımderdi reformalaý qajet. Al arnaıy salyqtyq rejım men bólshek salyqty transformatsııalaý josparlanyp otyr.

Qazir jeńildetilgen deklaratsııa júıesi jyldyq kirisi 180 mln teńgege deıingi, jumysshylar sany 30 adamǵa deıingi kásipkerler úshin 2% mólsherlemeni qarastyrady. Buǵan qosa, formaldy túrde bólshek salyq júıesi bolǵan. Ol jyldyq aınalymy 2,4 mlrd teńgege deıingi bıznesti qamtydy. Onda qyzmetkerler sanyna shekteý qoıylmaǵan jáne maslıhattardyń sheshimimen 4% mólsherlemesin eki ese tómendetý múmkindigi bolǵan.

Endi osy eki rejımdi birtutas jeńildetilgen deklaratsııa formatyna biriktirý kózdelip otyr, bul rette kiristiń joǵarǵy shegi saqtalady – ol shamamen 2,4 mlrd teńgeni quraıdy.

Salyqtyq túsimderdi arttyrý máselesi aldaǵy reformanyń negizgi taqyryptarynyń biri bolyp otyr. Úkimet bıýdjetke turaqty kiris kózin qamtamasyz etýdi, Ulttyq qorǵa táýeldilikti tómendetýdi jáne bıznesti damytý úshin qolaıly jaǵdaı jasaýdy kózdeıdi. Alaıda bul maqsattarǵa jetý úshin salyq saıasatynyń ınvestıtsııalyq ózgeristerge, kompanııalardyń básekege qabilettiligine jáne ekonomıkalyq ósimge yqpalyn eskerý qajet.

Salyq reformasyn jetildirý barlyq múddeli taraptardyń pikirlerin eskere otyryp júrgiziledi. Salyq júıesin jańǵyrtý – bıznestiń damýyna keri áser etpeıtindeı ári ekonomıkanyń básekege qabilettiligin saqtaıtyndaı etip júrgizý mańyzdy.

Osyǵan deıin Oljas Bektenovtyń SQO kásipkerlerimen salyq reformasyn talqylap, ózekti suraqtarǵa jaýap bergeni týraly habarlaǵan edik.